لاہور: وزیراعلیٰ سندھ مراد علی شاہ نے اپنے ہم شکل عرفان حیدر شاہ کاظمی کو ٹیلی فون کرکے ان سے بات چیت کی اور انہیں کراچی آنے کی دعوت دی جس پر عرفان حیدر خوشی سے نہال ہوگئے۔
وزیراعلیٰ کے ہم شکل عرفان حیدر اے آر وائی نیوز لاہور کے دفتر پہنچ گئے جہاں انہوں نے خود پروموٹ کرنے پر اے آر وائی نیوز کا شکریہ ادا کیا اور وزیراعلیٰ سندھ کی جانب سے دعوت دینے سے متعلق بتایا۔
عرفان حیدر نے کہا کہ انہیں وزیراعلیٰ سندھ نے فون کیا تو میں نے کہا یار آپ مذاق کررہے ہیں تو انہوں نے کہا کہ آپ انتظار کریں میں آپ کو لینڈ لائن نمبر سے کال کرتا ہوں بعدازاں ایک سرکاری لینڈ لائن نمبر سے ان کے پرسنل سیکریٹری کی کال موصول ہوئی جس کے بعد وزیراعلیٰ سندھ نے ان سے بات چیت کی اور انہیں کراچی آنے کی دعوت دی۔
عرفان حیدر نے بتایا کہ وزیراعلیٰ کا کہنا تھاکہ ہم ایک سے دو دن میں آپ کو کراچی آنے کی دعوت دیں گے اور آپ ایک دن کے لیے ہمارے مہمان ہوں گے، انہوں نے دعوت ملنے پر انتہائی خوشی کا اظہار کیا۔
