کوئٹہ: گورنر بلوچستان محمد خان اچکزئی کا کہنا ہے کہ آزادی کی نعمت طویل قربانیوں کے نتیجے میں ملتی ہے اس لیے جشن آزادی کی تقاریب کو شایان شان طریقے سے منا رہے ہیں۔
ان خیالات کا اظہار انہوں نے ایوب اسٹیڈیم میں جشن آزادی اسپورٹس فیسٹیول کا آغاز کرتے ہوئے کیا۔ تقریب میں کمانڈر سدرن کمانڈر لیفٹیننٹ جنرل عامر ریاض نے بطور مہمان خصوصی شرکت کی۔ اس موقع پر کمانڈر لیفٹیننٹ نے خطاب کرتے ہوئے کہا کہ ’’بلوچستان کے نوجوانوں پر فخر ہے، نوجوانوں کے چہروں کی خوشی ان کے شوق کی نشاندہی کررہی ہے، بلوچستان کے غیور نوجوانوں نے کبھی مایوس نہیں کیا اور ہر کڑے وقت میں ملک کا نام روشن کیا‘‘۔
انہوں نے مزید کہا کہ ’’جشن آزادی ویک فیسٹیول کے انعقاد کا مقصد باصلاحیت کھلاڑیوں کو سامنے لانا ہے اور اس کے ذریعے ملک کے دشمنوں کو واضح پیغام دینا ہے کہ پاکستانی عوام اپنی آزادی کے موقع کر جوش و خروش سے منارہے ہیں‘‘۔
فیسٹیول کا افتتاح گورنر بلوچستان محمد خان اچکزئی نے کیا۔ اس آزادی فیسٹیول کی رنگا رنگ افتتاحی تقریب ایوب اسٹیڈیم میں منعقد کی گئی جس میں نمائشی میچ بھی کھیلا گیا جبکہ مختلف اسکولوں کے طلبا کی جانب سے 300 فٹ طویل قومی پرچم بردار آزادی ریلی نکالی گئی۔
قبل ازیں میراتھن ریس بھی افتتاحی تقریب میں آکر ختم ہوئی جس میں کامیاب ہونے والے ایتھلیٹس کو گورنر بلوچستان اور کمانڈر سدرن کمانڈ نے انعامات دیے۔
