لندن : پاکستان کرکٹ ٹیم کے کپتان مصباح الحق اور لیگ اسپنر یاسر شاہ کا نام لارڈز کے آنر بورڈ پر درج کردیا گیا, یہ کرکٹ کی تاریخ میں پہلا موقع ہے کہ کھلاڑیوں کی موجودگی میں ان کے نام بورڈ پردرج کیے گئے۔
قومی ٹیسٹ ٹیم کے کپتان مصباح الحق اور یاسر شاہ نے لارڈز میں خوشگوار یادوں کو تازہ کیا، لارڈز ٹیسٹ کی پہلی اننگز میں کپتان مصباح الحق نے شاندار سینچری بناکر آنر بورڈ پر اپنا نام درج کرایا، لارڈز انتظامیہ نے مصباح کے سامنے ان کا نام آنر بورڈ پر درج کیا۔
مصباح الحق 42 سال 47 دن کی عمر میں بطور سینچری مکمل کرنے والے دنیا کے 9ویں کپتان بھی بن چکے ہیں، اس کے ساتھ مصباح الحق پاکستانی تاریخ کے سب سے عمر رسیدہ کپتان بھی بن گئے ہیں۔
سینچری مکمل کرنے پر کپتان بہت خوش نظر آئے اور انہوں نے گراؤنڈ میں 10 پُش اپس لگا کر اس لمحے کو دنیائے تاریخ کے لیے یادگار بنا دیا۔
یاسر شاہ لارڈز ٹیسٹ میں دس وکٹیں حاصل کرکے آنر بورڈ پر نام درج کرانے والے پہلے ایشیائی اسپنر بنے، انتظامیہ نے یاسر کی موجودگی میں آنر بورڈ پر ان کا نام درج کیا۔
یاسر شاہ نے لارڈز ٹیسٹ میں عمدہ بولننگ کا مظاہرہ کرتے ہوئے 10 وکٹیں حاصل کرتے ہوئے پاکستان کو فتح دلوائی تھی۔ انگلینڈ کے خلاف ٹیسٹ سریز میں یاسر شاہ نے 15 ٹیسٹ میچز میں سب سے زیادہ وکٹیں لے کر 120 سالہ ریکارڈ توڑ کر اعزاز اپنے نام کرلیا تھا۔
یہ کرکٹ کی تاریخ میں پہلی بار ہوا ہے کہ آنر بورڈ پرکھلاڑیوں کا نام انکی موجودگی میں درج کیا گیا ہو۔
