کراچی: قانون نافذ کرنے والے اداروں کا اسپتال میں چھاپہ ارشد پپو گروپ کا زیر علاج کارندہ گرفتار تفتیش کے لیے نامعلوم مقام پر منتقل کردیا گیا۔
تفصیلات کے مطابق قانون نافذ کرنے والے اداروں نے خفیہ اطلاع ملنے کے بعد کراچی کے ایک اسپتال میں چھاپہ مارتے ہوئے لیاری گینگ وار ارشد پپو گروپ کے کارندے بہرام بلوچ کو گرفتار کرلیا ہے۔
سیکیورٹی اداروں نے اس بات کا امکان ظاہر کیا ہے کہ گرفتار ہونے والا ملزم ہفتے کے روز اولڈ ایریا میں سیکیورٹی فورسز سے مقابلے کے دوران زخمی ہوا تھا اور وہاں سے باآسانی فرار ہونے میں کامیاب ہوا گیا تھا، سیکیورٹی حکام کے مطابق ملزم بہرام بلوچ اغوا، قتل، بھتہ خوری سمیت دیگر دہشت گردی کی سنگین جرائم میں ملوث رہا ہے۔
قبل ازیں قانون نافذ کرنے والے اداروں نے طبی ماہرین سے ملزم کی طبیعت کے بارے تفیصلی تبادلہ خیال کیا اور پھر اُسے وہاں سے باقاعدہ گرفتار کر کے تفتیش کے لیے نامعلوم مقام پر منتقل کیا۔
اسپتال ذرائع نے اس بات کی تصدیق کی ہے کہ ’’قانون نافذ کرنے والے اداروں کے چھاپے کے دوران ملزم کے ساتھ رہنے والا فرد فرار ہونے میں کامیاب ہوگیا ہے تاہم ملزم تین روز قبل علاج کے لیے اسپتال منتقل ہوا تھا۔
یاد رہے اس سے قبل بھی کراچی کے سول اسپتال سے لیاری گینگ وار کے کارندے گرفتار ہوچکے ہیں۔
