ڈھاکہ : بنگلہ دیش کی سکیورٹی فورسز نے دارالحکومت ڈھاکہ کے نواح میں شدت پسندوں کے ٹھکانے پر چھاپہ مار کر تین اسلامی شدت پسندوں سمیت گذشتہ ماہ کیفے پر حملہ کرنے والی کالعدم تنظیم کے ماسٹر مائنڈ کو ہلاک کرنے کا دعویٰ کیا ہے.
تفصیلات کےمطابق ڈھاکہ کے جنوب میں 25 کلومیٹر کے فاصلے پر موجود ناراین گنج نامی شہر کے علاقے پیکپارا میں شدت پسندوں کے ٹھکانے کو نشانہ بنایا گیا.پولیس اور شدت پسندوں کے درمیان ایک گھنٹے تک فائرنگ کا تبادلہ جاری رہا.
پولیس اور شدت پسندوں کے درمیان فائرنگ میں کیفے حملے کا ماسٹر مائنڈ اور جمعیت المجاہدین کا سربراہ تمیم چوہدری ہلاک ہوگیا.
*ڈھاکہ ریسٹورینٹ حملہ، 20 غیرملکی سمیت حملہ آور 6 دہشت گرد بھی ہلاک
خیال رہے کہ یکم جولائی کو شدت پسندوں نے ڈھاکہ کے سفارتی علاقےمیں کیفے پر حملہ کیا تھا جس میں غیر ملکیوں سمیت 22 افراد ہلاک ہو گئے تھے.
کمانڈوز نے 12 گھنٹے تک کیفے کے محاصرے کرنے کے بعد 13 افراد کو بچا لیا تھا جبکہ چھ مسلح حملہ آوروں کو ہلاک اور ایک کو گرفتار کیا گیا تھا.
واضح رہے کہ تمیم چوہدری سنہ 2013 میں کینیڈا سے بنگلہ دیش لوٹا تھااور کالعدم تنظیم جے ایم بی کی قیادت کر رہاتھا.
