ٹیکسلا : وفاقی وزیر داخلہ چوہدری نثارعلی خان نے کہا ہے کہ پاکستان کی سرحدوں کی حفاظت کے لیے پوری قوم متحد ہے،آج اندرونی سیاست کا نہیں بیرونی دشمن کیخلاف متحد ہونے کا وقت ہے۔
ان خیالات کا اظہار انہوں نے ٹیکسلا میں میڈیا سے گفتگو کرتے ہوئے کیا۔ چوہدری نثار علی خان نے کہا کہ ہمارے ملک میں ہونے والی دہشت گردی کے پیچھے بھارت کا ہاتھ ہے۔
بھارت پاکستان کا براہ راست مقابلہ نہیں کرسکتا اس لیے وہ چھپ کر وار کرے گا، ان کہنا تھا کہ ہم بھارت کی گیدڑ بھبکیوں سے ڈرنے والے نہیں ہے۔
India is behind terrorism in Pakistan, says… by arynews
بھارت کیخلاف پوری قوم متحد ہے۔ اگر کسی نے بھی پاکستان کی طرف میلی آنکھ سے دیکھا، تو یہ قوم ایک مکے کی طرح یکجا ہو گی۔
مودی کی گزشتہ روز کی تقریر کے بعد یہ ضروری ہوگیا ہے کہ ہم متحرک سفارتکاری کریں اور عالمی برادری کو بتائیں کہ خطے میں شرپسندی کون پھیلا رہا ہے۔
ان کا کہنا تھا کہ مودی کی تقریر سے واضح ہو گیا کہ کون امن اور کون جنگ چاہتا ہے۔ میں نے آج تک کسی ملک کے سربراہ کو اس قسم کی زبان استعمال کرتے نہیں دیکھا۔
ہمسایہ ملک کی دھمکیوں سے بھی دنیا کو آگاہ کرنا چاہیے۔ ایک وزیر اعظم کی ایسی تقریر کا اقوام متحدہ سمیت تمام ممالک کو نوٹس لینا چاہیے۔
