کراچی : سربراہ جماعت اہلسنت پاکستان کے سربراہ علامہ سید شاہ تراب الحق قادری طویل علالت کے بعد انتقال کرگئے۔
تفصیلات کےمطابق جماعت اہلسنت پاکستان کے سربراہ علامہ سید شاہ تراب الحق قادری کراچی میں اسٹیڈیم روڈ پر واقع نجی اسپتال میں زیر علاج تھے جوآج طویل علالت کے بعد انتقال کرگئے۔
علامہ سید شاہ تراب الحق قادری گزشتہ دو سال سے علیل تھے اور نجی اسپتال میں زیرعلاج تھے۔مرحوم کی نماز جنا زہ ایم اے جناح روڈ پر ادا کی جا ئے گی۔
مفتی منیب الرحمان کا کہنا ہے کہ شاہ تراب الحق کے انتقال کی خبرسن کر افسوس ہوا ان کی دینی خدمات کو ہمیشہ یاد رکھا جائے گا۔ انہوں نے کہا قومی اسمبلی میں ان کی بہت وسیع خدمات تھیں۔
رویت ہلال کمیٹی کےسربراہ مفتی منیب الرحمان کا کہنا تھا کہ علامہ شاہ تراب الحق دارالعلوم امجدیہ کے ٹرسٹی بھی تھے اور انہوں نے دینی ادارہ بھی قائم کیا ہوا تھا۔
مزید پڑھیں: فاروق ستار کی شاہ تراب الحق سے عیادت
یاد رہے کہ گزشتہ روز سربراہ ایم کیو ایم پاکستان ڈاکٹر فاروق ستار کی سربراہی میں متحدہ کے وفد کی جماعت اہلسنت کے سربراہ علامہ شاہ تراب الحق کی مقامی اسپتال جاکر عیادت کی تھی اور جلد صحت یابی کے لیے نیک خواہشات کا اظہار کیا تھا۔
