اسلام آباد: ن لیگ کے رہنما پرویز رشید کے وزارت اطلاعات سے مستعفی ہونے سے متعلق شیخ رشید نے پہلے ہی پیش گوئی کردی تھی۔
تفصیلات کے مطابق عوامی مسلم لیگ کے سربراہ شیخ رشید نے اے آر وائی نیوز کے پروگرام ’’پاور پلے‘‘ میں اینکر پرسن ارشد شریف سے گفتگو کرتے ہوئے دعویٰ کیا تھا کہ قومی سلامتی سے متعلق خبر لِیک کرنے والوں کے خلاف ثبوت جمع کر لیے گئے ہیں اور حساس اداروں نے تمام ثبوت وفاقی حکومت کو مہیا کردیے ہیں جس کے بعد وفاقی وزیر اطلاعات پرویز رشید کی برطرفی طے ہے۔
شیخ رشید نے مزید کہا کہ وفاقی حکومت کو وزیر اطلاعات اور ایک بیورو کریٹ کی قربانی دینا پڑے گی، بیورو کریٹ نے سلطابی گواہ بننے کا وعدہ کر لیا ہے اور اگر وہ سلطانی گواہ بن گیا تو کوئی وزیراعظم کو پھانسی چڑھنے سے نہیں روک سکتا۔
شیخ رشید نے حکومت کو تنقید کا نشانہ بناتے ہوئے کہا کہ قومی سلامتی سے متعلق خبر کے بعد کسی ایک فرد کے فوج میں رہنے یا جانے کی بات نہیں بلکہ بہ طور ادارہ فوج کا موجودہ حکومت پر اعتماد نہیں رہا۔
واضح رہے کہ وفاقی وزیر اطلاعات اور نشریات کی برطرفی کی خبر منظر عام پر آنے سے کئی گھنٹے قبل شیخ رشید نے اے آر وائی نیوز کے پروگرام پاور پلے میں نیوز بریک کردی تھی۔
