کراچی / کوئٹہ / لاہور: چہلم امام حسینؓ کے موقع پر امن و امان کی صورتحال کو برقرار رکھنے کے لیے متعلقہ صوبوں میں دفعہ 144 نافذ کردی گئی ہے جس کے تحت ڈبل سواری پر پابندی عائد کی گئی جبکہ لاہور میں جلوس کے شرکاء کی بائیو میٹرک تصدیق کو لازم قرار دیا گیا ہے۔
تفصیلات کے مطابق چہلم امام حسینؓ کے موقع پر امن و امان کی صورتحال کو برقرار رکھنے کےلیے شہر میں دو روز کے لیے دفع 144 نافذ کردی گئی ہے، جس کے تحت شہر بھر میں ڈبل سواری پر پابندی عائد کردی گئی ہے تاہم صحافیوں، بزرگوں ، خواتین اور بچوں کو اس پابندی سے مستشنیٰ قرار دیا گیا ہے۔
شہر بھر میں امن و امان کی فضاء کو برقرار رکھنے کے لیے جلوس کی گزرگاہوں پر آنے والے راستوں کو کنٹینر لگا کر بند کردیا گیا ہے جبکہ ایم اے جناح روڈ اور اس سے ملحقہ دکانوں کو سیل لگا کر بند کردیاگیاجبکہ صوبائی حکومت نے تعلیمی درسگاہیں بند رکھنے کا اعلان بھی کیا ہے۔
پڑھیں: ’’ سندھ بھرمیں دو روز کیلئے ڈبل سواری پر پابندی عائد ‘‘
بلوچستان کے علاقے کوئٹہ میں بھی سیکیورٹی کو ہائی الرٹ کردیا گیا ہے جبکہ پورے شہر میں ایک ماہ کے لیے دفعہ 144 نافذ کردی گئی ہے جس کے تحت اجتماعات، جلسہ جلوس اور اسلحے کی نمائش پر پابندی عائد کی گئی ہے۔
دوسری جانب لاہور میں چہلمِ امام حسینؓ کے جلوس کا سیکیورٹی پلان ترتیب دے دیا گیا ہے، جلوس کے روٹ پر 2500 پولیس اہلکاروں کو تعینات کیا جائے گا جبکہ جلوس میں شرکت کرنے والے افراد کے لیے بائیو میٹرک سسٹم کی تصدیق کو لازمی قرار دیا گیا ہے۔
