اسلام آباد : قومی سلامتی سے متعلق خبر کے شائع ہونے کی تحقیقات کرنے والی تحقیقاتی کمیٹی کا خفیہ اجلاس جسٹس (ریٹائرڈ) عامر رضا کی زیر صدارت منعقد ہوا جس میں پرویز رشید کی خفیہ ملاقاتوں کی ویڈیوز اور شواہد پیش کیےگئے۔
تفصیلات کے مطابق قومی سلامتی سے متعلق خبر کے شائع ہونے کی تحقیقات کے لیے تحقیقاتی کمیٹی کے سربراہ جسٹس (ریٹائرڈ) عامر رضا کی زیرِ صدارت خفیہ اجلاس منعقد ہوا،اجلاس میں کمیٹی کے دیگر اراکین بھی موجود تھے۔
اے آر وائی نیوز اسلام آباد کے نمائندے ذوالقرنین حیدر کا کہنا ہے کہ نیوز گیٹ اسکینڈل کے خفیہ اجلاس میں کمیٹی نے متنازع خبر سے متعلق دستاویزات کا جائزہ مکمل کرلیا کمیٹی کے اراکین نے بعض ویڈیو اور فوٹیجز بھی دیکھیں۔
اس موقع پر کمیٹی کے اراکین کو سابق وفاقی وزیر اطلاعات و نشریات پرویز رشید کی ملاقاتوں کی ویڈیوز بھی پیش کی گئی جس کا کمیٹی نے بغور مشاہدہ کیا اور اہم نکات نوٹ کیے۔
علاوہ ازیں اجلاس میں وزارتِ اطلاعات کے بعض افسران کے بیانات بھی قلم بند کیے گئے جب کہ وزارتِ اطلاعات کے افسران کی بعض شخصیات سے ملاقاتوں کا ویڈیو ریکارڈ بھی تلاش کرنے کی کوششیں جاری ہیں۔
تحقیقاتی کمیٹی نے مختلف ذرائع سے حاصل شواہد اور دستاویزات کا فرانزک آڈٹ کا فیصلہ کیا ہے تا کہ تحقیقات میں شفافیت برقرار رہے اور قومی سلامتی سے متعلق اہم کیس کومنطقی انجام تک پہنچایا جا سکے۔
