کراچی : رینجرز اور پولیس نے مختلف علاقوں میں سرچ آپریشن کے دوران درجنوں مشتبہ افراد کو حراست میں لے لیا، بھاری تعداد میں زیرزمین چھپایا گیا اسلحہ بھی برآمد کرلیا گیا۔
تفصیلات کے مطابق کراچی میں امن وامان کی صورت حال کو قابو میں رکھنے کیلئے رینجرز اور پولیس سرگرم ہیں، لائنز ایریا واٹرپارک میں رینجرز اور پولیس نے مشترکہ سرچ آپریشن کیا۔
آپریشن کے دوران سات مشتبہ افراد کو حراست میں لیا، جس کے بعد گراؤنڈ میں زیر زمین چھپایا گیا بھاری تعدادمیں اسلحہ اوربال بم برآمد کیے گئے۔
اورنگی ٹاؤن کے علاقے فقیر کالونی میں پولیس نے جرائم پیشہ افراد کی موجودگی کی خفیہ اطلاع پر سرچ آپریشن کرکے چھ مشتبہ افراد کو گرفتارکیا۔
پولیس حکام کے مطابق آپریشن لیاری گینگ وار کے اہم کارندے کی تلاش میں کیا گیا تھا۔ دوسری جانب پی آئی بی کالونی پولیس نے منو گوٹھ اور دیگر علاقوں میں سرچ آپریشن کے دوران بائیس مشتبہ افراد کو حراست میں لےلیا ہے۔
