اسلام آباد: وزیر خزانہ اسحاق ڈار نے کہا ہے کہ ماہ دسمبر کے لیے پیٹرول کی قیمت میں دو روپے فی لٹر کا اضافہ کیا گیا ہے۔
وفاقی وزیر اسلام آباد میں صحافیوں سے بات کر رہے تھے انہوں نے کہا کہ موجودہ حکومت نے گزشتہ سات مہینے سے پیٹرولیم مصنوعات کی قیمتوں میں اضافہ نہیں کیا۔
انہوں نے بتایا کہ ماہ دسمبر کے لیے پیٹرول کی قیمت میں دو روپے فی لٹر اضافہ کیا گیا ہے اور ڈیزل کی قیمت میں دو روپے 70 پیسے اضافہ کیا جا رہا ہے جب کہ مٹی کے تیل اور لائٹ ڈیزل کی قیمتیں برقرار رکھی جائیں گی،قیمتوں میں اضافے کا اطلاق یکم دسمبر 2016 سے ہوگا۔
وفاقی وزیر خزانہ نے کہا کہ اوگرا کی جانب سے پیٹرول کی قیمت میں 4 روپے فی لٹر اور ہائی اوکٹین میں 6 روپے کے اضافے کی سمری بھیجی تھی لیکن حکومت عوام پر بوجھ ڈالنے کے بجائے انہیں سہولیات فراہم کرنے کی پالیسی پر گامزن ہے۔
پیٹرول کی قیمت دو روپے اضافے کے بعد اب 66.24 روپے فی لٹر ہو جائے گی جب کہ ڈیزل 46 روپے فی لٹر ہو جائے گی جب کہ دیگر پیٹرولیم مصنوعات کی قیمتیں برقرار رہیں گی۔
