کراچی : شہر قائد میں ایک شہری نے لوٹ مارکرنے والے ملزمان پر گولیاں بر سا دیں۔ شہری کی فائرنگ سے دو ڈاکو ہلاک ہوگئے۔ طارق روڈ پر ہونے والے واقعے میں دو راہ گیروں کو بھی گولیاں لگ گئیں۔
تفصیلات کے مطابق کراچی کے علاقے طارق روڈ پر شہری نے اس وقت ڈاکوؤں پر گولیاں برسا دیں جب ڈاکو ناکہ لگا کر شہریوں سے لوٹ مار کرنے میں مصروف تھے۔
فائرنگ کے نتیجے میں دونوں ڈاکو موقع پر ہلا ک ہوگئے۔ دونوں ڈاکو شہری عبدالرحمان کی فائرنگ کا نشانہ بنے، ہلاک ہونے والے ایک ڈاکو کی شناخت آغا گل کے نام سے ہوگئی جو اس سے پہلے بھی اسٹریٹ کرائم کی متعدد وارداتوں میں ملوث تھا۔
اطلاع ملتے ہی پولیس موقع پر پہنچ گئی۔ پولیس نے ہلاک ہونے والے ڈاکو کے قبضے سے اسلحہ برآمد کرکے لاشوں کو تحویل میں لے کر پوسٹ مارٹم کیلئے اورزخمی راہگیروں کو تشویش ناک حالت میں طبی امداد کیلئے جناح اسپتال منتقل کردیا۔
ڈاکوؤں کو فائرنگ سے ہلاک کرنے والا عبدالرحمان اہل خانہ کے ساتھ ہوٹل پر کھانا لینے آیا تھا، عینی شاہدین کے مطابق شہری نے بہادری کامظاہرہ کرتے ہوئے لوگوں کو قیمتی اشیاء سے محروم ہونے سے بچالیا۔
پولیس حکام کے مطابق عبدالرحمان کی فائرنگ کی زد میں آکر دو راہ گیر بھی زخمی ہوئے ہیں جن سے پوچھ گچھ کی جارہی ہے۔
