کراچی: وزیرٹرانسپورٹ سندھ ناصر حسین شاہ نے کہا ہے کہ میئر کراچی کے پاس کافی اختیارات ہیں پہلے اُس پر کام کریں، ترقیاتی کام کی ذمہ داری سندھ حکومت کی ہے جبکہ میئر کراچی شہر صرف پانی کی ترسیل اور شہری کی صفائی کے ذمہ دار ہیں۔
ان خیالات کا اظہار انہوں نے میڈیا سے گفتگو کرتے ہوئے کیا۔ ناصر حسین شاہ کا کہنا تھا کہ میئر کراچی اچھے انسان ہیں اور حکومت سندھ اُن کے ساتھ مکمل تعاون کررہی ہے، سندھ حکومت ہر ماہ کراچی میونسپل کارپوریشن (کے ایم سی ) کو 50 کروڑ روپے دیتی ہے۔
انہوں نے کہا کہ میئر کراچی کے پاس پہلے ہی بہت اختیارات ہیں مگر وہ اُن پر کام کرنے کے بجائے مزید اختیارات مانگ رہے ہیں، وسیم اختر کو چاہیے کہ جتنے اختیارات ہیں پہلے اُن پر کام کرلیں۔
پڑھیں: ’’ کچرا اٹھانے اور صفائی کے لیے اختیارات کی ضرورت نہیں، مصطفیٰ کمال ‘‘
ناصر حسین شاہ کا کہنا تھا کہ ماضی میں اختیارات دیے گئے تو بلدیاتی نمائندوں کے ذریعے اداروں میں بے تحاشہ بھرتیاں کی گئیں، اختیارات میں توازن ہونا بہت ضروری ہے تاکہ کوئی بھی شخص حد سے تجاوز نہ کرسکے۔
سندھ اسمبلی میں کے واقعے پر ناصر حسین شاہ نے کہا کہ امداد پتافی کو چیئرمین کی ہدایت پر شوکاز نوٹس جاری کردیا ہے، خاتون ایم پی اے قابل احترام ہیں اس طرح کے واقعات ہونا اچھی بات نہیں۔
مزید پڑھیں: بلاول کی ہدایت پر امداد پتافی کو شوکاز نوٹس جاری
وزیر ٹرانسپورٹ کا مزید کہنا تھا کہ شہر کے ترقیاتی کاموں کی ذمہ داری حکومت سندھ کی ہے جبکہ میئر کراچی اور اُن کی ٹیم پر شہر کی صفائی اور پانی کی ترسیل کی ذمہ داری عائد ہوتی ہے۔
