اسلام آباد : حکومت نے 1500 طلباء و طالبات کو پی ایچ ڈی کے لیے امریکا بھیجنے کا فیصلہ کیا ہے، اس سلسلے میں اقتصادی رابطہ کمیٹی کے اجلاس میں پاک امریکا نالج کوریڈور کے تحت پی ایچ ڈی پروگرام کی منظوری دے دی گئی۔
تفصیلات کے مطابق وزیر خزانہ اسحاق ڈار کی زیر صدارت اقتصادی رابطہ کمیٹی (ایکنک) کا اجلاس منعقد ہوا، جس میں کئی ترقیاتی منصوبوں کی منظوری دی گئی، اجلاس میں پاک امریکا نالج کوریڈور کے تحت پی ایچ ڈی پروگرام کی منظوری دی گئی منصوبے کے تحت 1500 طلباء وطالبات کو پی ایچ ڈی کے لیے امریکا بھیجا جائے گا۔
ہائرایجوکیشن کمیشن کے لیے پاک امریکا نالج کوریڈور کے تحت 18 ارب روپے کے پی ایچ ڈی پروگرام کی منظوری اور مختلف اضلاع میں سرکاری یونیورسٹیز کے ذیلی کیمپسز قائم کرنے کی بھی منظوری دی گئی جس پر 5 ارب 21 کروڑ روپے لاگت آئے گی۔
گرین پاکستان جنگلات کا 3ارب 65 کروڑ روپے کا منصوبہ منظورکیا گیا، اس منصوبے سے پنجاب، کے پی کے، سندھ اور گلگت بلتستان میں جنگلات کو فروغ ملے گا۔ بلوکی اور حویلی بہادر شاہ میں 2450 میگا واٹ کے 2 منصوبے منظور کیے گئے جبکہ نیلم جہلم منصوبے کے لیے پالیسی رپورٹ منظور کی گئی۔
علاوہ ازیں بلوچستان، سندھ اور کے پی کے میں متعدی امراض سے بچاﺅ کے پروگرام کی منظوری بھی دی گئی۔ بلوچستان میں بیماریوں سے بچاؤ کے لیے 5 ارب روپے، خیبرپختونخوا کے لیے ساڑھے 6 ارب روپے اور سندھ میں بیماریوں سےبچاؤ کے لیے 8 ارب کے منصوبوں کی منظوری دی گئی۔
