واشگنٹن : بڑے امریکی تھنک ٹینکس نے ٹرمپ انتظامیہ کی ممکنہ پاکستان پالیسی کے حوالے سے رپورٹ جاری کر دی۔ رپورٹ میں پاکستان کو ایک ابھرتی ہوئی جوہری قوت قرار دیتے ہوئے پاکستان میں اسلامی شدت پسندی کے فروغ پر بھی تحفظات کا اظہار کیا گیا ہے۔
واشگنٹن میں اے آر وائی نیوز کے نمائندے جہاں زیب علی کے مطابق امریکہ کے معروف ترین پالیسی ساز تھنک ٹینکس ہیریٹیج فاؤنڈیشن اور ہڈسن انسٹی ٹیوٹ نے مستقبل میں پاک امریکہ تعلقات کی سمت طے کرنے کیلئے ایک تفصیلی رپورٹ جاری کر دی ہے۔
رپورٹ میں ٹرمپ انتظامیہ سے کہا گیا ہے کہ پاکستان کے ساتھ تعاون اور امداد کو شرائط سے مشروط کرنے کی ضرورت ہے جبکہ پاکستان کو کالعدم تنظیموں، جہادی گروپس، اقلیتو ں کے حقوق اور بین الاقوامی برادری کے ساتھ تعاون کیلئے دباؤ ڈالنے کی ضرورت ہے۔
حسین حقانی ہڈسن انسٹی ٹیوٹ رپورٹ میں پاکستان کو ایک ابھرتی ہوئی جوہری قوت قرار دیا گیا اور ساتھ ساتھ ہی پاکستان میں اسلامی شدت پسندی کے فروغ پر بھی تحفظات کا اظہار کیا گیا۔
رپورٹ کی خالق ہیریٹیج فاؤنڈیشن کی ڈائریکٹر لیزا کرٹس کہتی ہیں کہ نواز شریف کی حکومت شدت پسندی کوشکست اور پڑوسی ممالک سے تعاون کیلئے صحیح سمت میں کام کر رہی ہے۔
اس موقع پر پاکستانی سفارت خانے کے اعلی اہلکار نے رپورٹ کو جانبدارانہ قرار دیتے ہوئے اس کے مندراجات سے اختلاف کیا اور دہشت گردی کیخلاف جنگ میں پاکستانیوں کی قربانیوں کی نشاندہی کی۔
سوال جواب کی سیشن کے دوران کچھ پاکستانیوں نے حسین حقانی اور لیزا کرٹس سے سخت مزاج میں سوالات کئے اور کشمیر کے معاملے پر توجہ دینے کا بھی مطالبہ کیا،جبکہ سوال کرنے والے ایک شخص کو اخلاقیات کی حدود پار کرنے پر سیکورٹی نے عمارت سے باہر بھی نکال دیا۔
حاضرین میں موجود چند امریکی تجزیہ کاروں کی رائے میں خطے میں امن و استحکام کیلئے پاکستان کی اہمیت سے انکار نہیں کیا جاسکتا۔
