لاہور: پنجاب حکومت کے ترجمان کا کہنا ہے کہ ملزمان کو سیف سٹی کے کیمروں کی مدد سے شناخت کرلیا ہے، دہشت گرد جلد ہماری گرفت میں ہوں گے.
ترجمان پنجاب حکومت کا کہنا ہے کہ گذشتہ روز رونما ہونے والے نا خوشگوار واقعے کے ملزمان کو سیف سٹی کے کیمروں کی مدد سے شناخت کرلیا ہے.
صوبائی حکومت کے ترجمان ملک محمد احمد نے اے آر وائی سے گفتگو کرتے ہوئے کہا کہ جلد ہی ملزمان ہماری گرفت میں ہونگے، پنجاب میں کسی آپریشن کی ضرورت نہیں ہے،رینجرز اور فوج پہلے ہی آپریشنز کررہے ہیں.
انہوں نے کہا کہ ڈی آئی جی ٹریفک اور پولیس افسران کو ٹارگٹ کرکے شہید کیا گیا ہے ، جوانوں کی شہادت پر ان کو سلام پیش کرتے ہیں.
ملزمان کو قرار واقعی سزا دینگے تاکہ اس قسم کے واقعات مستقبل میں رونما نہ ہو۔
مزید پڑھیں: لاہور دھماکا: ڈی آئی جی ٹریفک اور ایس ایس پی سمیت 13 شہید، 70 زخمی
گذشتہ روز پنجاب اسمبلی کے سامنے دھماکے کے سبب ڈی آئی جی ٹریفک اور ایس ایس پی سمیت 13 افراد شہید اور 70 سے زائد زخمی ہوئے تھے.
واضح رہے نیکٹا کی جانب سے 7 فروری کو مراسلے کے ذریعے سے اس واقعے کے متعلق آگاہ کردیا گیا تھا.
