کراچی / خیبر ایجنسی / پشاور : سانحہ سہون شریف کے بعد کراچی سے فاٹا تک قانون نافذ کرنے والے اداروں نے ا دہشت گردوں کیخلاف بھرپور کارروائی کرتے ہوئے چند گھنٹوں میں چالیس سے زائد دہشت گرد ہلاک کردیئے، کارروائیوں میں اسلحہ، گولہ بارود،افغانی اور عراقی کرنسی برآمد کی گئی۔
تفصییلات کے مطابق سانحہ سہون شریف کے بعد فاٹا سے کراچی تک فورسز ایکشن میں آگئیں، اہلکاروں نے چند گھنٹوں میں درجنوں دہشت گردوں کو ان کے عبرت ناک انجام تک پہنچا دیا۔ خیبرایجنسی میں ایف سی جوانوں نے افغانستان سے حملہ کرنے والے کئی دہشت گردوں کومارڈالا۔
آئی ایس پی آرکا کہنا ہے کہ حملے میں چیک پوسٹ پر تعینات دواہلکار بھی زخمی ہوئے، ہنگو میں سرحد پار سے چیک پوسٹ پرحملہ کرنے والےچار دہشت گرد فورسز کی کارروائی میں مارے گئے، لوئر دیرمیں بھی فورسز نے چیک پوسٹ پر دھاوا بولنے والےدو شدت پسندوں کو مارگرایا۔
کرم ایجنسی میں ایک سڑک پربم نصب کرتے ہوئے دو دہشت گرد فورسز کےہاتھوں انجام کو پہنچے، بنوں بکاخیل میں سیکورٹی فورسز نے کامیاب آپریشن کرتے ہوئے چار دہشت گردمارڈالے۔
سیکیورٹی ذرائع کے مطابق ہلاک دہشت گردوں کے قبضے سے افغانی اور عراقی کرنسی برآمد ہوئی ہے، پشاور کےعلاقے ریگی میں پولیس اور فورسزکی مشترکہ کارروائی میں تین دہشت گردوں کو ٹھکانے لگایا گیا، ڈی آئی خان میں پولیس وین پرحملہ کرکے فرارہونے والےدو دہشت گرد مارے گئے۔
پولیس وین پر فائرنگ سےچار اہلکاروں سمیت پانچ افرادجاں بحق ہوئے، دوسری جانب سی ٹی ڈی نے سرگودھا میں فیصل آباد روڈ پردو دہشت گردوں کو ہلاک کردیا۔
ہلاک دہشت گردوں سے بارودی مواد اوراسلحہ برآمد ہوا ہے، کوئٹہ کےعلاقے درخشاں میں ایف سی کارروائی میں کالعدم تنظیم کے دودہشت گردہلاک ہوئے۔ فائرنگ کے تبادلے میں دو ایف سی اہلکار بھی زخمی ہوئے ہیں۔
