لاہور: قومی کرکٹ ٹیم کے کھلاڑی عمر اکمل ایک بار پھر پولیس اہلکاروں سے جھگڑ پڑے۔ اہلکاروں نے فینسی نمبر پلیٹ کے خلاف کارروائی کے دوران ان کی گاڑی کی نمبر پلیٹ اتار لی جس پر عمر اکمل سیخ پا ہوگئے۔
پاکستان سپر لیگ سے آؤٹ ہونے کے بعد کرکٹر عمر اکمل اب بھی خبروں میں ہیں۔ فینسی نمبر پلیٹس کے خلاف کارروائی کے دوران ایکسائز اہلکاروں، پولیس اور کرکٹر عمر اکمل کے درمیان تلخ جملوں کا تبادلہ ہوا۔
ایکسائز اہلکاروں نے انہیں روک کر اپنی گاڑی سے فینسی نمبر پلیٹ اتارنے کو کہا جس پر عمر اکمل نے انکار کردیا، تاہم ایکسائز اہلکاروں نے زبردستی ان کی گاڑی کی نمبر پلیٹ اتار لی۔
بعد ازاں میڈیا سے گفتگو کرتے ہوئے عمر اکمل نے کہا کہ پولیس کا انداز میرے ساتھ بہت خراب تھا۔ اہلکاروں نے مجھ سے نازیبا کلمات کہے اور میری گاڑی کی نمبر پلیٹ توڑ ڈالی۔
انہوں نے کہا کہ اگر میں غلط تھا تو مجھے بتایا جاتا، میں خود نمبر پلیٹ اتار دیتا مگر پولیس کی جانب سے جارحانہ اقدام درست نہیں ہے۔ پولیس کو مجھے گالیاں دینے اور بدتمیزی کرنے کا کوئی حق نہیں ہے۔
واضح رہے کہ تنازعے کا شکار عمر اکمل کے ساتھ پیش آنے والا یہ پہلا واقعہ نہیں ہے۔ وہ اس سے قبل بھی متعدد بار مختلف تنازعات کا شکار رہے ہیں۔
کچھ عرصہ قبل بھی عمر اکمل ایک وارڈن سے جھگڑ پڑے تھے۔ وارڈن کی جانب سے مقدمے کے بعد عمر اکمل کے وارنٹ گرفتاری بھی جاری ہوئے تاہم عمر کے والد کی جانب سے معافی مانگنے کے بعد معاملہ ختم ہوگیا۔
اس سے قبل چیئرمین پی سی بی شہریار خان نے بھی شکایت کی تھی کہ عمر اکمل ڈریسنگ روم کا ماحول خراب کرتے ہیں اور ساتھی کھلاڑیوں کے ساتھ لڑائی جھگڑے کرتے ہیں۔
