کراچی: سی ٹی ڈی ذرائع نے کہا ہےکہ چوہدری اسلم کے گھر پر حملے میں اُن کا اپنا ہی محافظ کامران ملوث تھا۔
سی ٹی ڈی ذرائع کے مطابق چوہدری اسلم کےگھرپرحملےمیں ان کا اپنا ہی قریبی محافظ ملوث تھا، تفتیش میں یہ بات سامنے آئی ہے کہ محافظ کامران نے عمران عرف موٹا اور دلدار کو شہید پولیس انسپیکٹر کے گھر کی ریکی کروائی۔
سی ٹی ڈی ذرائع کا کہنا ہے کہ کامران پولیس میں آنے سے پہلے کالعدم تنظیم سے وابستہ تھا، ملزم کامران نے عمران موٹا کے ذریعے بخاری سے رابطہ کیا اور چوہدری اسلم کے گھر پر حملے کا منصوبہ بنایا تاہم چوہدری اسلم کے گھر پر حملے کے وقت کامران اور اُس کا ساتھی مارا گیا تھا۔
سی ٹی ڈی ذرائع کے مطابق چوہدری اسلم اپنے ساتھیوں میں سے سب سے زیادہ کامران پر اعتماد کرتے تھے اور وہی اُن کے گھر پر ڈیوی دیتا تھا۔
یاد رہے ایس ایس پی سی آئی ڈی چوہدری اسلم بہادر آفیسر تسلیم کیے جاتے تھے، انہوں نے سینکڑوں انتہاء پسندوں کو مقابلے میں ہلاک کیا تاہم دہشت گردوں کی جانب سے بھی اُن پر متعدد بار حملے کیے گئے تاہم تین سال قبل عیسیٰ نگری پر ہونے والے خود کش حملے میں چوہدری اسلم جامِ شہادت نوش کرگئے۔
