بیجنگ : یقیناً آپ نے دنیا بھر میں ریلوے ٹریک کے ارد گرد تو سینکڑوں بازار اور رہائشی عمارتیں آباد تو دیکھی ہوں گی یا ٹرینوں کو سرنگوں سے گزرتا بھی دیکھا ہوگا لیکن چین میں ایک ایسا انوکھی ٹرین ہے جو کسی سرنگ میں سے نہیں بلکہ ایک رہائشی عمارت میں سے گزرتی ہے۔
چین کے گنجان آباد شہر چونگ کیون میں جب ریلوے ٹریک بچھانے کی بات آئی تو مسئلہ درپیش آیا کیونکہ ٹریک کے راستے میں عمارتیں موجود تھیں ، چینیوں نے ٹریک کے بیچ آنے والی عمارتوں کو گرانے کے بجائے انکے درمیان سے راستہ نکالنے کا فیصلہ کیا۔
اس انوکھے ریلوے ٹریک کو ایک 19 منزلہ رہائشی عمارت کے درمیان سے گزارا گیا ہے، اس رہائشی عمارت کی چھٹی سے آٹھویں منزل تک ایک خاص ریلوے اسٹیشن قائم کیا گیا ہے، رہائشی عمارت ہونے کی وجہ سے ٹرینوں کے شور کو انتہائی کم کرنے کے لیے یہاں خصوصی آلات کا استعمال کیا گیا ہے۔
اس ٹرین کے شور کی آواز کچھ ایسے سنائی دیتی ہے، جیسے کوئی برتن دھو رہا ہو، عمارت کے رہائشی اس ٹرین میں اپنی عمارت میں قائم اسٹیشن سے ہی سوار ہوتے ہیں۔
چین میں کثیر آبادی والے شہر کو ’ ماؤنٹین سٹی ‘ کہا جاتا ہے کیونکہ یہ ایک پہاڑی اور جنگلات میں گھرا ہوا ہے۔
شہری انتظامیہ کا کہنا ہے کہ ہمارے شہر میں بہت زیادہ تعمیرات ہیں اور ایسی صورت میں سڑکوں اور ریلوے ٹریک کے لیے جگہ تلاش کرنا انتہائی مشکل کام ہوتا ہے۔
