اسلام آباد : اپوزیشن لیڈر خورشیدشاہ حکومت کے خلاف پھٹ پڑے، انکا کہنا ہے کہ مرغی،سبزیوں کی قیمتوں میں اضافہ حکومتی ناکامی کا ثبوت ہے۔
تفصیلات کے مطابق پاکستان پیپلز پارٹی کے رہنما سید خورشید شاہ نے میڈیا سے گفتگو کرتے ہوئے کہا کہ حکومت ہر معاملے سے جان چھڑانے کی کوشش کررہی ہے، ریاست کو حکومتی پالیسیوں کی وجہ سے ناکامی کا سامنا ہے، ن لیگ والے ناکامی کو سازش کا نام دیتے ہیں۔
انہوں نے کہا کہ حکومت کا ہر معاملے کو سازش قراردینا سب سے بڑی ناکامی ہے،کیا ہر سازش نواز حکومت کیخلاف ہی ہوتی ہے اور حکومت اپنی ناکامیوں کو چھپانے کی کوشش نہ کرے۔
مزید پڑھیں : مرغی کی قیمت میں ہوش ربا اضافہ
خیال رہے کہ مرغی کے ساتھ ٹماٹر، آلو اور پیاز کی قیمتوں کو بھی پر لگ گئے ہیں، ملک بھر میں ناجائز منافع خوروں نے مرغی کی قیمتوں میں من مانا اضافہ کردیا ہے، حکومتی نرخ 190 روپے مقرر ہونے کے باوجود مختلف شہروں میں مرغی کی قیمت ساڑھے 3 سو روپے فی کلو تک وصول کی جارہی ہے۔
مرغی کے ساتھ سبزیاں بھی مہنگی کردی گئی ہیں، قلت کے سبب ملک بھر میں ٹماٹر کی قیمت کو بھی پر لگ گئے ہیں، مختلف شہروں میں ٹماٹر 115 روپے سے لے کر 150 روپے تک فروخت ہو رہا ہے۔ لہسن، ادرک، آلو، پیاز اور ہری مرچ کی قیمتیں بھی آسمان سے باتیں کر رہی ہیں۔
قیمتوں میں ہوش ربا اضافے سے عوام کو شدید مشکلات کا سامنا ہے۔
عوام کا کہنا ہے کہ حکومت قیمتوں میں اضافے کا فوری نوٹس لے، وزیر اعظم نے بھی ہوشر با مہنگائی کا نوٹس لیا ہے تاہم عوام ابھی بھی قیمتوں میں کمی کے منتظر ہیں۔
