نابلس : پچاس سالہ سیکیورٹی گارڈ نے طویل نماز پڑھانے پر امام مسجد پر حملہ کر کے آگ لگانے کی کوشش کی تاہم وہاں موجود نمازیوں نے امام مسجد کو زندہ جلنے سے بچا کر ملزم کو پکڑ کر پولیس کے حوالے کردیا۔
تفصیلات کے مطابق فلسطین کے علاقے نابلس میں ایک شخص نے امام مسجد پر اس وقت حملہ کرکے زندہ جلانے کی کوشش کی جب وہ فجر کی نماز پڑھا کر فارغ ہی ہوئے تھے۔
فلسطین کی نیوز ایجنسی کے مطابق ایک عمارت کے سیکیورٹی گارڈ نے آج پٹرول سے بھری بوتل کو امام مسجد پر انڈیل کر انہیں آگ لگانے کی کوشش کی جس کے نتیجے میں امام مسجد زخمی ہوگئے جب کہ مسجد کو بھی معمولی نقصان پہنچا۔
آگ بھڑک اٹھنے پر مسجد سے باہر نکلتے ہوئے نمازیوں کو واقعے کی حساسیت کا علم ہوا، وہ مسجد کے اندر داخل ہوئے اور آگ پر قابو پانے کی کوششوں میں جُت گئے اسی دوران کچھ نمازیوں نے بھاگتے ملزم کو پکڑ کر پولیس کے حوالے کیا۔
دورانِ تفتیش ملزم کا کہنا تھا کہ امام مسجد طویل نماز پڑھایا کرتے تھے جس کے لیے میں نے کئی بار تنبیہ بھی کہ لیکن وہ باز نہیں آئے اس لیے آج موقع پاکر انہیں جلانے کی کوشش کی۔
فلسطینی پولیس نے ملزم کو حراست میں لے کر عبادت گاہ پر حملہ کرنے، اسے آگ لگانے اور نفرت آمیز اقدام کی دفعہ کے تحت مقدمہ درج کر لیا ہے اورتحقیقات کا آغازکردیا ہے جب کہ ابتدائی شواہد کو محفوظ کر کے فرانزک لیب بھجوایا گیا ہے۔
