اسلام آباد: قومی اسمبلی میں قائد حزب اختلاف اور پی پی کے رہنما خورشید شاہ نے قومی اسمبلی اور سینیٹ کی اپوزیشن جماعتوں کا اجلاس طلب کرلیا۔
اطلاعات ہیں کہ یہ اجلاس کل پارلیمنٹ ہاؤس میں ہوگا، اجلاس میں سیاسی صورتحال اور پارلیمانی اجلاسوں کی حکمت عملی پر غور ہوگا۔
اجلاس میں پیپلز پارٹی، پی ٹی آئی، جماعت اسلامی، ق لیگ، اےاین پی، شیخ رشید، آفتاب شیرپاؤ شرکت کریں گے۔
خورشید شاہ نے کہا ہے کہ فیصلہ اخلاقی طور پر نواز شریف کے خلاف آیا ہے، میری نظر میں پاناما کیس کا فیصلہ بڑا واضح ہے، دو ججز نے واضح کہا کہ نواز شریف کو نااہل کیا جائے، تین ججز انکاری نہیں ہوئے اور جے آئی ٹی بنانے کا کہا۔
جے آئی ٹی وزارت داخلہ کے ماتحت ہے، تحقیقات کیا کرے گی؟؟
ان کا کہنا تھا کہ جےآئی ٹی کے افراد وزارت داخلہ یا خزانہ کے ماتحت ہیں، یہ کیا تحقیقات کریں گے؟ نوازشریف کو اخلاقی طور پر مستعفی ہوجانا چاہیے۔
سیاست میں کوئی آخری دوست یا آخری دشمن نہیں ہوتا
تحریک انصاف کے ساتھ ہاتھ ملائیں گے؟صحافی کے اس سوال پر خورشید شاہ نے کہا کہ سیاست میں کوئی آخری دوست یا آخری دشمن نہیں ہوتا، فیصلے کا جائزہ لے کر پارلیمنٹ میں مشترکہ حکمت عملی پر غور کریں گے۔
جن اداروں کو نا اہل کہا ان ہی سے تحقیقات کا کہا جارہا ہے
ان کا مزید کہنا تھا کہ عجیب بات ہے جن اداروں کو نا اہل کہا اب ان سے تحقیقات کا کہا جارہا ہے۔
