لاہور : پی ایس ایل اسپاٹ فکسنگ کیس میں معطل کرکٹر شاہ زیب حسن پر پی سی بی نے فرد جرم عائد کر دی، شاہ زیب کے وکیل کا کہنا ہے کہ ٹربیونل کی کارروائی سے مطمئن ہیں۔ عدالت نہیں جائیں گے۔
تفصیلات کے مطابق اسپاٹ فکسنگ کیس میں معطل کرکٹر شاہ زیب حسن پی سی بی ٹریبونل کے سامنے پیش ہوگئے, اینٹی کرپشن ٹربیونل نے نیشنل کرکٹ اکیڈمی لاہور میں اسپاٹ فکسنگ کیس کی ابتدائی سماعت کی۔
دوران سماعت شاہ زیب حسن پر پاکستان سپر لیگ (پی ایس ایل ) میں جواریوں کی جانب سے رابطہ کرنے کے بارے میں پی سی بی کو آگاہ نہ کرنے پر اینٹی کرپشن کوڈ کی خلاف ورزی کا مرتکب قرار دیا گیا اور ان پر فرد جرم عائد کی گئی۔
پی سی بی چار مئی کو شاہ زیب کے خلاف ٹربیونل کو ثبوت پیش کرے گا۔ اٹھارہ مئی کو شاہ زیب الزامات کا جواب دیں گے۔ کیس باقاعدہ سماعت یکم جون سے شروع ہوگی۔
اس حوالے سے شاہ زیب کے وکیل کا کہنا ہے کہ وہ ٹربیونل کی کارروائی سے متفق ہیں لہٰذا عدالت نہیں جائیں گے۔ اسپاٹ فکسنگ کیس میں شاہ زیب پر اینٹی کرپشن کوڈ کی تین شقوں کی خلاف ورزی کا الزام ہے۔
ذرائع کے مطابق اینٹی کرپشن ٹربیونل کی سماعت کے دوران کمیٹی کے چیئرمین جسٹس اصغر حیدر، کمیٹی کے ممبران لیفٹیننٹ جنرل ریٹائرڈ توقیر ضیائ، وسیم باری، پی سی بی کے ویجی لینس اور سیکیورٹی ڈیپارٹمنٹ کے سربراہ کرنل ریٹائرڈ محمد اعظم خان موجود تھے جبکہ شاہ زیب حسن اور ان کے وکیل بیرسٹر ملک کاشف رجوانہ پیش ہوئے۔
