گوجرانوالہ : ملک بھر میں بھرپور قوت کے ساتھ آپریشن ردالفساد کے تحت کارروائیاں جاری ہیں ۔ گوجرانوالہ سے جماعت الاحرار کے تین کارندے پکڑے گئے دیگر شہروں سے بھی درجنوں ملزم دھر لیے گئے۔
تفصیلات کےمطابق کاؤننٹر ٹیرر ازم ڈیپارٹمنٹ (سی ٹی ڈی) نے خفیہ معلومات پرگوجرانوالہ میں ایک کامیاب کارروائی کر کے تین مبینہ دہشت گرد گرفتار کرلیے۔
ترجمان سی ٹی ڈی کے مطابق تینوں گرفتار دہشت گردوں کا تعلق جماعت الاحرارسے ہے، گرفتار دہشت گرد حساس تنصیبات پر حملوں کی منصوبہ بندی کررہے تھے.
دہشت گردوں کے قبضے سے بھاری مقدار میں بارودی مواد بھی برآمد ہواہے۔ دوسری جانب سوات میں سی ٹی ڈی نے کارروائی کرتے ہوئے اہم دہشت گرد کو گرفتار کرلیا، ملزم داؤد دو ہزار سات میں اسکولوں کو جلانے میں ملوث رہا ہے.
سی ٹی ڈی نے نوشہروفیروز کے علاقے محراب پور میں کارروائی کر کے ایک دہشت گرد کو گرفتار کرلیا، گرفتار دہشت گرد کا تعلق قوم پرست جماعت سے ہے، ملزم محراب پور ریلوے ٹریک بم دھماکے کا مرکزی ملزم ہے۔