اسلام آباد : ڈان لیکس رپورٹ کی سفارشات پر منظوری دیتے ہوئے حکومت نے راؤتحسین کو بھی عہدے سے ہٹا دیا، انہیں اسٹیبلشمنٹ ڈویژن رپورٹ کرنے کی ہدایت کردی گئی ہے، اس حوالے سے نوٹیفکیشن بھی جاری کر دیاگیا ہے۔
تفصیلات کے مطابق ڈان لیکس کے معاملے پر وزیراعظم کے معاون خصوصی طارق فاطمی کے بعد پرنسپل انفارمیشن آفیسر راﺅ تحسین کو بھی عہدے سے ہٹانے کا نوٹیفکیشن جاری کر دیا گیا ہے۔
رپورٹ سامنے آنے کے بعد جو سفارشات کی گئیں تھیں اس کے تحت ایکشن لے لیا گیا ہے اور راﺅ تحسین کو عہدے سے ہٹانے کا حکم جاری کر دیا گیا ہے ۔
راﺅ تحسین کو اسٹیبلشمنٹ ڈویژن میں رپورٹ کرنے کی ہدایت کی گئی ہے ۔اس کے علاوہ وزیراعظم نے راﺅ تحسین کیخلاف محکمانہ کارروائی کا حکم بھی جاری کر دیا ہے۔
راﺅ تحسین تین سال قبل پرنسپل انفارمیشن آفیسر مقرر ہوئے تھے، نوٹیفکیشن سید توقیر حسین کے دستخط سے جاری کیا گیا ہے۔
مزید پڑھیں : ڈان لیکس، وزیر اعظم نے طارق فاطمی کو عہدے سے ہٹا دیا
علاوہ ازیں ڈان لیکس رپورٹ کی سفارشات پرعملدرآمد کے بعد طارق فاطمی نے آج معمول کے امور نمٹائےاور دفتر سے رخصت ہوگئے، اس سے قبل طارق فاطمی نے سیکریٹری خارجہ سے اہم ملاقات کے علاوہ دیگر حکام سے بھی الوداعی ملاقاتیں کیں۔
ذرائع کے مطابق طارق فاطمی نے دو روز پہلے ہی اپناسامان پیک کرلیا تھا، طارق فاطمی دفترخارجہ میں موجود ذاتی سامان بھی ساتھ لے گئے ہیں۔
