ریاض: سعودی عرب میں ایک خاتون اپنے شوہر کے خلاف اس بات پر عدالت پہنچ گئیں کہ وہ اسے گائے، گدھی اور ایسے دیگر نازیبا ناموں سے پکارتا ہے۔
سعودی گزٹ کے مطابق سعودیہ عربیہ میں ایک خاتون نے اپنے شوہر کے خلاف عدالت میں مقدمہ دائر کردیا ہے، درخواست میں انہوں نے موقف اختیار کیا ہے کہ ان کا شوہر بدکلامی کرتا ہے اور مجھے گائے، گدھی اور ایسے ہی دیگر ناموں سے پکارتا ہے ،عدالت کارروائی کرے۔
خاتون کی درخواست پر عدالت نے ضلعی میئر کو حکم دیا ہے کہ دو ہفتوں کے بعد ہونے والی سماعت پر خاتون کے شوہر کو پیش کیا جائے۔
قوانین کے مطابق پہلے اس شکایت کو مصالحتی کمیٹی دور کرنے کی کوشش کرے گی تاہم بات نہ بنی تو مقدمہ کی عدالت میں باقاعدہ سماعت شروع ہوجائے گی۔
عرب میڈیا نے سعودی عدالتوں کے حوالے سے بتایا ہے کہ دائر ہونے والے مقدمات میں سے 25 فیصداسی نوعیت کے ہوتے ہیں جن میں کسی کے ساتھ زبانی بدتمیزی کی گئی ہو یا اسے نسلی طور پر برا بھلا کہا گیا ہو۔
