کراچی : انسداد دہشت گردی کی عدالت نے ایم کیو ایم کے سابق رہنما سلیم شہزاد کوعلاج کی غرض سے بیرون ملک جانے کی اجازت دے دی۔
تفصیلات کے مطابق آج دہشت گردوں کےعلاج سے متعلق اے ٹی سی میں کیس کی سماعت ہوئی جہاں معزز عدالت ایم کیو ایم کے سابق رہنما سلیم شہزاد کو علاج کی غرض سے بیرون ملک جانے کی درخواست قبول کرتے ہوئے 30 دن کے لیے بیرون ملک جانے کی اجازت دے دی۔
عدلات کے حکم پر جائیداد کے کاغذات جمع کرانے کےعوض سلیم شہزاد کو پاسپورٹ دیا جائے گا جس کے لیےعدالت نے ڈی جی امیگریشن اینڈ پاسپورٹ کوخط لکھ دیا ہے، پاسپورٹ ملنے کے فوری بعد سلیم شہزادبہت جلدعلاج کیلئےلندن روانہ ہوجائیں گے۔
اسی سے متعلق ایم کیوایم رہنما سلیم شہزاد کراچی ایئرپورٹ سے گرفتار
خیال رہے سلیم شہزاد کینسر کے مریض ہیں اور دوران حراست انہوں نے چیئرمین تحریک انصاف عمران خان سے شوکت خانم کینسر اسپتال میں علاج کرانے کی بھی درخواست کی تھی جسے قبول کرتے ہوئے عمران خان نے کراچی سے عمران اسماعیل کو سلیم شہزاد سے ملنے سینٹرل جیل بھی بھیجا تھا۔
یاد رہے* سابق رہنما ایم کیوایم سلیم شہزاد نے 22 اگست کو کی گئی پاکستان مخالف تقریرکے بعد بانی ایم کیو ایم سے لاتعلقی کا اعلان* کردیا تھا اور6 فروری 2017 کو دبئی سے وطن واپس پہنچے تو انہیں ایئرپورٹ سے حراست میں لے لیا گیا تھا۔
سلیم شہزاد بانی ایم کیو ایم کے ابتدائی دور کے ساتھی اور مرکزی کمیٹی میں وائس چیئرمین کے فرائض انجام دیتے تھے جو بعد ازاں اپنے قائد کے ساتھ ہی 1991 میں خود ساختہ جلاوطنی اختیار کر کے لندن چلے گئے تھے۔
یہ بھی پڑھیں : سابق متحدہ رہنما سلیم شہزاد جیل سے رہا
وہ لندن میں اہم عہدوں پر براجمان رہے تاہم اختلافات کے باعث 2000 کے بعد انہیں تنظیمی عہدوں سے بتدریج ہٹایا جاتا رہا اور گزشتہ چند سالوں سے گمنامی کی زندگی بسر کر رہے تھے۔
