یورپی ملک آسٹریا میں نیند سے جھومتے ٹرک ڈرائیور سے مرغیوں سے بھرا ٹرک بے قابو ہوگیا جس کے باعث ہزاروں مرغیاں سڑک پر گر گئیں اور انہوں نے ہائی وے کو بلاک کردیا۔
یہ واقعہ اس وقت پیش آیا جب دن کے وقت ایک ٹرک ڈرائیور اپنے ٹرک میں مرغیوں کو ایک جگہ سے دوسری جگہ منتقل کر رہا تھا۔ ڈرائیور کا کہنا ہے کہ ٹرک چلاتے ہوئے لمحہ بھر کو اسے نیند کی جھپکی آئی جس سے ٹرک ایک قریبی پل کے ستون سے جا ٹکرایا۔
ٹرک کے ٹکراتے ہی مرغیوں سے بھرے ڈبے اچھل کر ٹرک سے باہر گر پڑے جس سے ہزاروں مرغیوں نے باہر نکل کر ہنگامہ برپا کردیا۔
ٹرک میں 75 ہزار مرغیوں سے بھرے ڈبے موجود تھے جن کے باہر نکلتے ہی سڑک پر مرغیوں کا سیلاب آگیا۔ موقع پر موجود افراد نے امدادی کارکنان کو طلب کیا جنہوں نے آتے ہی سب سے پہلے ہائی وے کا ایک حصہ بند کردیا۔
سڑک پر موجود 120 ریسکیو اہلکاروں کو مرغیوں نے تگنی کا ناچ نچا دیا جو انہیں پکڑنے کی کوشش کر رہے تھے۔
واقعے میں کئی مرغیاں ادھر ادھر بھاگ نکلیں جنہیں پکڑا نہ جاسکا۔ کچھ مرغیاں ڈبوں اور گاڑیوں کے نیچے آنے سے ہلاک بھی ہوئیں۔
گھنٹوں تک اس بھاگ دوڑ کے باعث ہائی وے بلاک رہی اور لوگ گاڑیوں میں بیٹھے راستہ کھلنے کا انتظار کرتے رہے۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔
