کراچی: قومی ایئر لائن نے ریاض ایئرپورٹ کے لاکھوں ریال ادا نہیں کیے جس کے سبب ایئرپورٹ اتھارٹی نے آپریشن بند کرنے پر غور شروع کردیا ہے۔
تفصیلات کے مطابق خسارے سے دوچار پی آئی اے نے ریاض ایئرپورٹ اتھارٹی کے واجب الادا چالیس لاکھ ریال سے زائد کے واجبات ادا نہیں کیے ہیں۔
ریاض ایئرپورٹ اتھارٹی نے پی آئی اے کو پانچواں اور آخری یادہانی خط جاری کردیا ہے‘ خط کی کاپی اے آروائی نیوز کو موصول ہوگئی ہے۔
خط کے متن کے مطابق پی آئی اے نے 4ملین ریال سے زائد کے واجبات ادا نہیں کئے ہیں اور ریاض ایئرپورٹ اتھارٹی نے فوری طور پر واجبات کی ادائیگی کا مطالبہ کیا ہے۔
ذرائع کا کہنا ہے کہ پی آئی اے نے ریاض ایئرپورٹ اتھارٹی کے واجبات ادا نہیں کئے تو آپریشن بند کرنے پر بھی غور کیا جاسکتا ہے۔
ایک جانب پی آئی اے غیر ملکی ایئر پورٹس کے واجبات اد انہ کرکے دنیا بھر میں ملک کی بدنامی کا سبب بن رہی ہے تو دوسری جانب بھاری معاوضے پر افسران کی بھرتیوں کا سلسلہ جاری ہے۔
مالی خسارے کے باوجود پی آئی اے نے انیس جولائی کو کراچی میں دو روزہ مارکیٹنگ کانفرنس کا انعقاد کیا ہے جس میں ادارے کو کروڑوں روپے کے اخراجات برداشت کر نا پڑیں گے‘ یاد رہے کہ اس کانفرنس میں دنیا بھر سےپی آئی اے کے کنٹری مینجرز شرکت کر یں گے۔
اگرآپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اوراگرآپ کو یہ مضمون پسند آیا ہے تو اسے اپنی فیس بک وال پرشیئرکریں۔
