اسلام آباد : جمیعت علماء اسلام ف کے سربراہ مولانا فضل الرحمان نے کہا ہے کہ جے یو آئی ف ہماری جماعت حکومت کے ساتھ کھڑی ہےاور شاہد خاقان عباسی کو مکمل سپورٹ کرے گی، کرپشن کیخلاف جنگ تو عنوان ہے اصل میں کرپشن کی آڑ میں سیاسی جنگ لڑی جارہی ہے۔
ان خیالات کا اظہار انہوں نے جے یو آئی ف کی پارلیمانی پارٹی کے اجلاس کے بعد میڈیا سے گفتگو کرتے ہوئے کیا، مولانا فضل الرحمان کا کہنا تھا کہ حکومت کو رائے دیتے رہے ہیں اورآئندہ بھی موقع آئے گا تو مزید رائے بھی دینگے، وزیر اعظم کے انتخاب میں جے یوآئی ف شاہد خاقان عباسی کو ووٹ دے کر کامیاب بنائے گی۔
مولانافضل الرحمن کا مزید کہنا تھا کہ عمران خان کی دھمکی سے ان کی نیت واضح ہوگئی، سیاست بچوں کا کھیل نہیں ہے، ہم نے مردانہ وار سیاست کی ہے، ہم گیڈر بھبھکیوں سے ڈرنے والے نہیں۔
انہوں نے کہا کہ اب نظریاتی سیاست کاخاتمہ ہوچکا ہے، لیکن ہم نظریاتی سیاست کررہےہیں جس سےہمیں کوئی نہیں روک سکتا، ہم نے ایک مؤقف اپنایا ہے جس پر ہمیں دھمکیاں دی جارہی ہیں، بھاڑ میں جائے تمہاری دھمکیاں، تمہاری دھمکیوں کی کوئی حیثیت نہیں ہے۔
انہوں نے کہا کہ گدلے قسم کے لوگ ہماری سیاست پرکیچڑ اچھال رہے ہیں، دنیا بھرمیں اب کرپشن جیسے عنوان پر سیاست ہوگی، کرپشن کیخلاف جنگ تو محض عنوان ہے، اصل میں سیاسی جنگ لڑی جارہی ہے، اصل عزائم کیا ہیں اور پس پردہ کیا چھپا ہوتا ہے سب کو معلوم ہے۔
نئے وزیراعظم کا انتخاب، شاہد خاقان کی فضل الرحمان سے ملاقات
مولانا فضل الرحمان کا کہنا تھا کہ اپوزیشن جماعتیں پہلے بھی سنجیدہ نہیں تھیں اب بھی نہیں ہیں، اپوزیشن کو پہلے کہا تھا کہ ایک دوسرے کو چور کہنے کا معاملہ بھی طے کرلیں۔
مزید پڑھیں: ملک میں جان بوجھ کربحران پیدا کیا گیا ہے، فضل الرحمان
ملک کوبحران کی طرف نہیں جانے دینا،دشمنوں کو روکنا ہے، ملک کی سلامتی کےلیے ہم ایک صفحے پرہونگے یکسوئی ہوگی، موجودہ حالات میں حکومت کےسامنےکوئی شرائط نہیں رکھ رہے۔
انہوں نے کہا کہ بین الاقوامی سازشیں ملک میں انتشار لانے کیلئے کی جارہی ہیں، عالمی گریٹ گیم کے تحت ترقی پذیر ممالک کو کمزور کیا جارہاہے۔
