طائف: سعودی عرب میں پولیس نے 7 سالہ پاکستانی لڑکی کی عصمت دری کے جرم میں ایک افریقی شہری کو گرفتار کرلیا جس نے جرم اعتراف کرلیا۔
عرب میڈیا کے مطابق مجرمانہ ماضی رکھنے والے افریقی شہری کو اس جرم کے شبہے میں گرفتار کرکے تفتیش کی گئی اور اس کے خلاف شواہد پیش کیے گئے تو اس نے اپنے جرم کا اعتراف کرلیا بعدازاں مجرم کو پبلک پراسیکیوٹر کے حوالے کردیا گیا تاکہ اس کے خلاف عدالتی کارروائی شروع کی جاسکے۔
مکہ پولیس کے پریس سیکریٹری نے بتایا کہ 16 اگست کو پولیس کو اطلاع ملی کی طائف میں رہائش پذیر ایک پاکستانی شہری کی 7 سالہ بیٹی ایک گھنٹے سے غائب ہے بعدازاں وہ گھر کے قریب سے نیم بے ہوشی کی حالت میں ملی ساتھ ہی انکشاف ہوا کہ نامعلوم شخص نے اس کے ساتھ زیادتی کی ہے۔
لڑکی کو فوری طور پر قریبی اسپتال منتقل کردیا گیا مگر وہ ہوش میں آنے کے بعد جسمانی اور ذہنی طور پر اس قابل نہیں تھی کہ پولیس کو کوئی بیان دے سکے یا کوئی معلومات فراہم کرسکے۔
پریس سیکریٹری کے مطابق فوری تفتیش شروع کرکے ایک افریقی شہری کو گرفتار کیا گیا جس نے جرم کا اعترف کرلیا ہے۔
عرب میڈیا کے مطابق حکام نے بچی سے اسپتال میں ملاقات کی اور بچے کے بہترین علاج کی ہدایات دیں بعدازاں بچی کو اسپتال سے فارغ کرکے ذہنی دباؤ سے نجات دلانے کے لیے نفسیاتی مرکز سے رجوع کرادیا ہے تاکہ اس کا ڈر اور خوف دور کیا جاسکے۔
