دبئی : مصر سے تعلق رکھنے والی دنیا کی وزنی ترین خاتون ایمان عبدالعاطی ابوظہبی کے اسپتال میں انتقال کرگئیں۔
تفصیلات کے مطابق 36 سالہ پانچ سوکلو گرام دنیا کی وزنی ترین خاتون ایمان عبدالعاطی انتقال کرگئیں، ایمان کو علاج کی غرض سے دبئی کے برجیل اسپتال میں داخل کیا گیا، دبئی کے اسپتال میں 20 ڈاکٹروں پر مشتمل ایک ٹیم ایمان کے علاج پر مامور تھی اور وقفے وقفے سے مختلف ٹیسٹ کے ذریعے ایمان کی صحت کے بارے میں ان کے اہل خانہ کو آگاہ کیا جاتا رہا۔
اسپتال سے جاری بیان کے مطابق ایمان دل کے مرض میں مبتلا تھی جب کہ اس کے گردوں نے بھی کام چھوڑ دیا تھا جو موت کی وجہ بنا اور مقامی وقت کے مطابق صبح 4 بجکر 35 منٹ پر وہ چل بسیں۔
ایمان کے لواحقین نے اسپتال کی جانب سے علاج معالجے کی سہولیات پر اطمینان کا اظہار کیا تاہم اس سے قبل بھارت میں علاج کے دوران انہوں نے کچھ شکایات کی تھیں۔
اس سے قبل دنیا کی سب سے وزنی خاتون کو مصر سے علاج کے لیے کارگو ہوائی جہاز میں بھارت لایا گیا اور ایمبولینس سے اسپتال بھی کرین کے ذریعے منتقل کیا گیا تھا، بھارت میں آپریشن سے ان کا وزن کم کر کے تین سو کلوگرام کر دیا گیا تھا۔
جس کے بعد بھارت میں مناسب سہولیات نہ ملنے پر ایمان کو ابوظہبی لے جایا گیا تھا۔
خیال رہے کہ گزشتہ بیس سال سے ایمان وزن زیادہ ہونے کی وجہ سے ایک قدم بھی نہیں اٹھا پاتی تھیں، زندگی کے آخری برس فالج کے اٹیک نے انہیں بسترسے لگا دیا تھا۔