دبئی : جرائم پیشہ افراد کا بچنا اب تقریباً ناممکن ہوگیا، پولیس نے اڑنے والی بائیک کا کامیاب تجربہ کر لیا۔
تفصیلات کے مطابق ٹیکنالوجی کی دنیا میں دبئی ایک اور قدم آگے بڑھ گیا، پولیس کےلئے ہنگامی حالات سے نمٹنے کے لئے جدید ترین ڈرون بائیک کاکامیاب تجربہ کر لیا گیا، بائیک ہنگامی صورتحال میں فوری ایکشن کے لیے استعمال کی جاسکتی ہے۔
ڈرون بائیک کو’’ہوورسرف‘‘ کا نام دیا گیا ہے اور یہ بائیک پانچ میٹر بلندی پر دو سو کلومیٹر فی گھنٹہ کی رفتار سے اڑ سکتی ہے اور ایک مرتبہ چارج کرنے پر 8 گھنٹے تک استعمال کی جاسکتی ہے۔
ڈرون موٹر سائیکل کو ریموٹ کنٹرول کی مدد سے آپریٹ کیا جاسکتا ہے۔
یاد رہے گذشتہ ماہ متحدہ عرب امارات میں دنیا کی پہلی خود کار فضائی ٹیکسی سروس کی آزمائشی پرواز کا تجربہ کیا تھا ، ٹونومس ایئر ٹیکسی ( اے اے ٹی ) نامی یہ سروس جلد ہی عوام کے لیے پوری طرح فعال کردی جائے گی، یہ دنیا کی پہلی ایئرٹیکسی سروس ہے، جو دبئی کی روڈ اینڈ ٹرانسپورٹ اتھارٹی اور دبئی سول ایوی ایشن کے اشتراک سے چلائی جائے گی۔
مزید پڑھیں : گاڑی کے بعد اڑنے والی موٹر سائیکل متعارف
دو نشستوں والی اس فضائی ٹیکسی میں بیک وقت دو مسافروں کے بیٹھنے کی گنجائش ہے اور یہ بغیر کسی پائلٹ کے آپریٹ کرے گی‘ اسے جرمنی کی ڈرون بنانے والی کمپنی ’وولوکاپٹر ‘نے تیار کیا ہے۔
