اسلام آباد: سجادہ نشین گولڑہ شریف پیر نظام الدین جامی نے کہا ہے کہ ختم نبوت سے متعلق تحفظات پر سمجھوتا نہیں ہوسکتا، اسلام آباد کے شہریوں کو جلد خوشخبری ملے گی۔

سجادہ نشین گولڑہ شریف پیر نظام الدین جامی ودیگر نے پریس کانفرنس کرتے ہوئے کہا کہ دھرنا منتظمین ہمارے ساتھ پریس کانفرنس میں موجود ہیں، ملکی سالمیت کو جو خطرات لاحق ہیں اس پر گفتگو ہوئی ہے۔

انہوں نے کہا کہ تحریک کے سربراہوں نے میری بات سے اتفاق کیا، اتفاق کیا گیا پاکستان ہمارا ملک ہے ہم نے اسے بچانا ہے، دھرنا منتظمین سے درخواست ہے آپ پر امن رہیں، اسلام آباد کے شہریوں کو جلد خوشخبری ملے گی۔

پیر نظام الدین جامی نے کہا کہ پچاس سے زائد سجادہ نشینوں کو کہا ہے حکومت سے مذاکرات چل رہے ہیں، ہم جلد از جلد اور قائدین سے سمجھوتے کی کوشش کررہے ہیں۔

انہوں نے کہا کہ حکومت کا دھرنے کے خلاف آپریشن یا ایکشن کا ارادہ ہے تو باز رہے، یہ سیاسی دھرنا نہیں، خالصتا مذہبی دھرنا ہے۔

پیر افضل قادری نے کہا کہ زاہد حامد استعفیٰ دیں یا انہیں ہٹایا جائے، تمام تر معاملات وزیر قانون کی سرپرستی میں ہوئے تھے۔

اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔