پاکستان نے امریکا کی قومی سلامتی حکمت عملی2017پر ردعمل دیتے ہوئے امریکی الزامات کومسترد کردیا۔
ترجمان دفترخارجہ کا کہنا ہے کہ امریکی الزامات دہشت گردی کی جنگ میں پاکستان کی کوششوں کی نفی کرتے ہیں، پاکستان نےخطے میں امن واستحکام کیلئے بے پناہ قربانیاں دیں، لہٰذا پاکستان بےبنیاد امریکی الزامات کو مسترد کرتا ہے۔
ترجمان دفترخارجہ کا مزید کہنا تھا کہ پاکستان دہشت گردی کیخلاف جنگ میں صف اول میں رہا، خطے سے القاعدہ کے خاتمے میں پاکستان کا تعاون عالمی برادری نے بھی تسلیم کیا ہے، پاکستان افغانستان میں ہمیشہ مقامی امن عمل کا خواہاں رہا ہے۔
انہوں نے کہا کہ پاکستانی سیکیورٹی فورسز نے ہمیشہ دہشت گردوں کےخلاف بلاامتیاز کارروائی کی، انسداد دہشت گردی آپریشنز کے باعث پاکستان آج زیادہ پرامن، محفوظ اور مستحکم ہے۔
ترجمان دفترخارجہ نے کہا کہ پاکستان ایک ذمہ دار جوہری قوت ہے، اس کے ایٹمی اثاثے محفوظ ہاتھوں میں ہیں، پاکستان کاجوہری کمانڈ اینڈ کنٹرول سسٹم انتہائی مؤثر اور محفوظ ہے، پاکستانی جوہری پروگرام کے حفاظتی انتظامات کسی دوسرے جوہری ممالک سے کم نہیں۔
مزید پڑھیں: پاکستان کودہشتگردوں کےخلاف فیصلہ کن کارروائی کرناہوگی،ٹرمپ
واضح رہے کہ امریکی صدرڈونلڈ ٹرمپ نے نئی نیشنل سیکیورٹی پالیسی کا اعلان کرتے ہوئے ایک بار پھر پاکستان سے ڈومورکا مطالبہ کیا ہے۔
صدر ٹرمپ کا کہنا ہے کہ پاکستان کو سالانہ کروڑوں ڈالرامداد دیتے ہیں، پاکستان کو بتادیا کہ دہشتگردوں کے خلاف فیصلہ کن کارروائی کرناہوگی اور پاکستان کو دہشت گردی کے خلاف ہماری مدد کرنا ہوگی۔
