اسلام آباد : مفتاح اسماعیل کو وزیراعظم شاہد خاقان عباسی کا مشیر برائے فنانس، ریونیو اور اکنامک افیئرز مقرر کردیا گیا ہے.
تفصیلات کے مطابق معروف ماہر معیشت مفتاح اسماعیل کو وزیر اعظم شاہد خاقان عباسی کا مشیر مقرر کردیا گیا ہے جس کا باقاعدہ اعلامیہ جاری کردیا گیا ہے.
اعلامیہ کے مطابق مشیر برائے مالیات، ریونیو اور اکنامک افیئرز مفتاح اسماعیل کا عہدہ وزیر خزانہ کے مساوی ہوگا اور مفتاح اسماعیل اسحاق ڈار کی جگہ اپنے فرائض انجام دیں گے.
مفتاح اسماعیل ماہر مالیات اور مسلم لیگ (ن) کے رہنما ہیں جنہیں نواز شریف کا قریبی ساتھی بھی سمجھا جاتا ہے اور وہ اس سے قبل وزیر اعظم کے معاون خصوصی برائے سرمایہ کاری بھی فرائض انجام دیتے رہے ہیں.
خیال رہے کہ گزشتہ روز صدر مملکت ممنون حسین نے پارلیمانی سیکرٹری برائے خزانہ اور رکن قومی اسمبلی رانا فضل خان سے وزیر مملکت برائے خزانہ کا حلف لیا تھا.
یاد رہے وفاقی وزیر خزانہ اسحاق ڈار علالت کے باعث لندن میں مقیم ہیں جہاں ان کی انجیو گرافی بھی ہوئی ہے اور شریانوں میں پیدا ہونے والی کمزوری کا علاج جاری ہے.
تجزیہ کاروں کا کہنا ہے کہ اب یہ دیکھنا ہے کہ شاہد خاقان عباسی کابینہ میں اسحاق ڈار کی کمی کو نو منتخب وزیر مملکت رانا اقبال اور مشیر مفتاح اسماعیل کی موجودگی سے پورا کرنے میں کامیاب ہو پاتے ہیں یا بحران یونہی سر اُٹھائے رکھے گا.
