اسلام آباد: تحریک انصاف نے سینیٹ انتخابات کے لیے اسحٰق ڈار کے کاغذات نامزدگی چیلنج کرنے کا فیصلہ کرلیا۔ اپوزیشن لیڈر میاں محمود الرشید کہتے ہیں کہ اسحٰق ڈار سمیت جنرل سیٹ اور ٹیکنو کریٹ کی نشستوں کو چیلنج کریں گے۔
تفصیلات کے مطابق پنجاب اسمبلی کے احاطے میں میڈیا سے گفتگو کرتے ہوئے اپوزیشن لیڈر میاں محمود الرشید کا کہنا تھا کہ سابق وزیر خزانہ اسحٰق ڈار اشتہاری ہے، اس کے خلاف منی لانڈرنگ اور کرپشن جیسے مقدمات ہیں، تحریک انصاف اسحٰق ڈار سمیت جنرل سیٹ اور ٹیکنو کریٹ کی نشستوں کو چیلنج کرے گی۔
انہوں نے کہا کہ اسحٰق ڈار کے جعلی دستخطوں سے کاغذات جمع کروائے گئے ہیں، ہم ان کاغذات کو چیلنج کرنے جا رہے ہیں۔ الیکشن کمیشن سے مطالبہ کریں گے کہ 1984 قانون شہادت کے تحت اسحٰق ڈار کو طلب کریں اور وکلا کی موجودگی اور اپنے سامنے اسحٰق ڈار کے کاغذات نامزدگی پر دستخط کروائیں۔
محمود الرشید نے کہا کہ اسحٰق ڈار کے کاغذات نامزدگی پر جعل سازی کی گئی، وہ اہم کیسز میں مطلوب ہے، اپنی وزارت سے استعفے کے باوجود حکومت سینیٹ میں اسحٰق ڈار کی نمائندگی چاہتی ہے، نیب سے درخواست ہے کہ وہ حرکت میں آئے اور ایکشن لے۔
انہوں نے مطالبہ کیا کہ عابد باکسر کے معاملے پر ہائی کورٹ کی سطح پر جوڈیشل کمیشن تشکیل دیا جائے۔ بیسیوں بے گناہ لوگوں کو جعلی پولیس مقابلوں میں مارا گیا، انکوائری کی جائے تاکہ پتہ چلے کہ ان بے گناہ لوگوں کے قتل کے پیچھے کن لوگوں کا ہاتھ ہے۔
خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔
