لاہور: امام کعبہ شیخ صالح بن محمد آل طالب کا کہنا ہے کہ سعودی عرب کے حکمران پاکستان کو احترام کی نگاہ سے دیکھتے ہیں، پاکستان سعودی عرب والوں کا دوسرا گھر ہے، خود کو محنت سے کام کرنے والوں کے درمیان پاکر فخر محسوس کررہا ہوں۔
تفصیلات کے مطابق امام کعبہ شیخ صالح بن محمد آل طالب موٹروے پولیس ٹریننگ کالج شیخوپورہ پہنچے ، جہاں آئی جی موٹروے کلیم امام اور دیگر افسران نے ان کا استقبال کیا۔
موٹر وے پولیس کی جانب سے امام کعبہ کوگارڈ آف آنر پیش کیا گیا جبکہ انھوں نے موٹر وے پولیس کےشہداکی یاد گار پر حاضری دی
موٹروے پولیس ٹریننگ کالج میں امام کعبہ نے خطاب میں موٹروے پولیس کی ڈیوٹی کو جہاد قرار دیا اور کہا کہ خود کو محنت سے کام کرنےوالوں کےدرمیان پاکرفخرمحسوس کررہاہوں ، پاک فوج نہ صرف پاکستان بلکہ عالم اسلام کےلیے کردار ادا کر رہی ہے۔
امام کعبہ کا کہنا تھا کہ ہم ہر طرح سے متمنی ہیں کہ پاکستان دن رات ترقی کرے، آپ لوگوں کی حفاظت کا عظیم کام سرانجام دے رہے ہیں۔
شیخ صالح بن محمد آل طالب نے مزید کہا کہ سعودی عرب کے حکمران پاکستان کو احترام کی نگاہ سے دیکھتے ہیں، پاکستان سعودی عرب والوں کادوسرا گھر ہے، میں آئی جی موٹروےاورحافظ عبدالکریم کا شکر گزار ہوں۔
مزید پڑھیں: وزیراعلیٰ پنجاب شہبازشریف سے امام کعبہ کی ملاقات
اس سے قبل امام کعبہ شیخ صالح بن محمد آل طالب نے وزیراعلیٰ پنجاب شہبازشریف سے ملاقات کی، جس میں باہمی دلچپسی کے امور پر تبادلہ خیال کیا گیا۔
اس موقع پر امام کعبہ شیخ صالح بن محمد آل طالب کا کہنا تھا کہ گزشتہ برس بھی لاہور آیا تھا اور یہاں بہت ترقی دیکھی اور اب آ کر اس ترقی میں مزید اضافہ دیکھا ہے، لاہور سمیت پنجاب تیزی سے ترقی کر رہا ہے۔
شیخ صالح بن محمد آل طالب کا کہنا تھا کہ پاکستان اور سعودی عرب اسٹریٹجک پارٹنر ہیں، پاکستان اورسعودی عرب کے تعلقات میں اضافہ ہو رہا ہے۔ انہوں نے کہا کہ حکومت، عوام اورپاک افواج کے تعاون کو قدر کی نگاہ سے دیکھتے ہیں، پاکستان کا خطے کے امن و استحکام میں اہم کردار ہے۔
مزید پڑھیں : اللہ اوررسول کی مخالفت کسی مسلمان پر جائز نہیں، امامِ کعبہ
گزشتہ روز لاہور میں نماز جمعہ کے خطبے میں امام کعبہ شیخ صالح بن محمد آل طالب کا کہنا تھا کہ اللہ اوررسول کی مخالفت کسی مسلمان پر جائز نہیں، رسول اللہﷺ کی زندگی مشعل راہ بنانے کی ضرورت ہے۔