اجمیر شریف : حضرت خواجہ غریب نوازکے عرس کی تیاریاں مکمل کرلی گئیں، دنیا بھر سے زائرین کی آمد کا سلسلہ جاری ہے۔
تفصیلات کے مطابق حضرت خواجہ معین الدین چشتی اجمیری سنجری غریب نواز رحمۃ اللہ علیہ کے آٹھ سو آٹھ ویں سالانہ عرس کی تیاریاں مکمل کرلی گئیں ہیں،عرس 19 سے29 مارچ جاری رہے گا۔
عرس میں شرکت کے لئے دنیا بھر سے زائرین کی آمد کا سلسلہ جاری ہے جبکہ پاکستان کے زائرین کو بھارتی سفارتخانے سے ویزہ نہ ملنے پر بڑی تعداد عرس میں شریک نہ ہوسکیں گی۔
مزید پڑھیں : خواجہ غریب نوازؒ کا عرس : بھارت نے پاکستانی زائرین کو ویزے جاری نہیں کئے
ترجمان مذہبی امور کا کہنا ہے کہ ہرسال 500 پاکستانی زائرین اجمیر شریف عرس میں شرکت کیلئے بھارت روانہ ہوتے ہیں، دونوں ممالک کے زائرین 1974 کے معاہدے کے تحت اپنے اپنے مذہبی مقامات پر جاتے ہیں۔
عرس کے موقع پر دربار عالیہ کی اندورون و بیرون سجاوٹ اور سیکیورٹی کے تمام انتظامات مکمل کرلیے گئے ہیں۔
خواجہ غریب نواز کے عرس پر اے آر وائی کیو ٹی وی خصوصی نشریات پیش کررہا ہے جبکہ چھٹی شریف کی تقریبات دربار اجمیر سے براہ راست نشر کرے گا۔
خواجہ معین الدین چشتی 13 ویں صدی میں فروغ اسلام کی غرض سے ایران سے برصغیر آئے، انہیں غریب نواز کے لقب سے جانا جاتا ہے، 1236 میں انکا انتقال ہوا ، جس کے بعد اس روز سے ان کا 6 روزہ عرس ان کی برسی کے موقع پر ہر سال منایا جاتا ہے۔
