اسلام آباد: وزیر ریلوے خواجہ سعد رفیق نے کہا ہے کہ چوہدری نثار عمران خان جیسے دغا باز کے جھانے میں نہیں آئیں گے، ان کی پی ٹی آئی میں شمولیت ممکن نہیں، بے ضمیر، بے وفا اور ابن الوقت لوگوں کےگٹھ جوڑ کا دوسرا نام تحریک انصاف ہے۔
ان خیالات کا اظہار انہوں نے چیئرمین تحریک انصاف عمران خان کے بیان پر رد عمل دیتے ہوئے کیا، سعد رفیق کا کہنا تھا کہ عمران خان نے کہا ہے کہ جلسوں کے باعث نواز شریف کے خلاف کیس سننا پڑا، یہ توہین عدالت ہے، انہوں نے اپنے خطاب میں کھلی توہین عدالت کی، کیا کوئی اپنے لاڈلے سے جواب طلبی کرے گا؟
چوہدری نثار کو تحریک انصاف میں شمولیت کی دعوت دیں گے: عمران خان
انہون نے کہا کہ مخالفین کا کام صرف الزامات لگانا ہے، عام انتخابات میں واضح ہوجائے گا کہ کس نے کتنا کام کیا، عوام اپنا فیصلہ الیکشن میں سنائیں گے جبکہ عمران خان اور آصف زرداری خاموش پارٹنرز بن چکے ہیں۔
وزیر ریلوے کا مزید کہنا تھا کہ ریلوے کے لئے صدق دل اور نیک نیتی سے کام کیا، جھوٹے الزامات تراشنے والے اللہ کے قہر سے ڈریں، لیکن افسوس کا مقام یہ ہے کہ ملک کے لئے کام کرنے کا صلہ الزامات اور سزائیں ہی ٹھہرا ہے۔
خیال رہے کہ آج تحریک انصاف کے چیئرمین عمران خان نے لاہور میں میڈیا سے گفتگو کرتے ہوئے کہا تھا کہ چوہدری نثار کو پی ٹی آئی میں شامل ہونے کی دعوت دیں گے، امید ہے قبول کرلیں گے، ہمیں اس بات کی خوشی ہے کہ انہوں نے مریم نواز کے خالف اسٹینڈ لیا۔
خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیاپر شیئر کریں۔
