پاکستانی فلم اور ڈرامہ انڈسٹری کے کئی فنکار بھارتی فلم انڈسٹری بالی ووڈ میں جا کر کام کرنا چاہتے ہیں، تاہم ایسے بالی ووڈ فنکاروں کی بھی کمی نہیں جو پاکستان آنا چاہتے ہیں۔
کئی بالی ووڈ فنکار ایسے ہیں جن کا پاکستان سے بہت گہرا تعلق ہے۔ ان میں سے کچھ کی پیدائش پاکستان کی ہے، جبکہ کچھ کے والدین پاکستانی شہری تھے جو بعد ازاں بھارت چلے گئے۔
آج ہم آپ کو ایسے ہی بھارتی فنکاروں سے ملوانے جا رہے ہیں جن کا تعلق کسی نہ کسی طرح پاکستان سے جڑا ہے۔
گلزار
بالی ووڈ کے معروف شاعر اور نغمہ نگار گلزار کی پیدائش پاکستانی ضلع جہلم کی ہے۔ سنہ 1934 میں پیدا ہونے والے گلزار کا اصل نام سمپورن سنگھ کالرا ہے جبکہ گلزار ان کا قلمی نام ہے۔
گلزار کو بھارت کے کئی قومی اعزازات سے نوازا جا چکا ہے۔
راج کپور
بالی ووڈ کے معروف اداکار، ہدایت کار اور پروڈیوسر راج کپور سنہ 1924 میں پشاور میں پیدا ہوئے تھے۔
راج کپور کو بھارت کے 2 قومی ایوارڈز سے نوازا گیا۔ 50 کی دہائی میں ریلیز ہونے والی فلم آوارہ میں ان کی اداکاری کو ٹائم میگزین کی جانب سے سنیما کی تاریخ کی 10 بہترین پرفارمنسز میں سے ایک قرار دیا گیا۔
دلیپ کمار
بالی ووڈ میں 6 دہائیوں پر محیط کیریئر کے مالک دلیپ کمار کا اصل نام محمد یوسف خان ہے۔ وہ سنہ 1922 میں پشاور میں پیدا ہوئے تھے۔
دلیپ کمار کو بھارت کے تیسرے بڑے سویلین اعزاز کے ساتھ ساتھ پاکستان کے سب سے بڑے سویلین اعزاز نشان امتیاز سے بھی نوازا جا چکا ہے۔
امریش پوری
بالی ووڈ فلموں میں عموماً ولن کا کردار ادا کرنے والے امریش پوری سنہ 1932 میں لاہور میں پیدا ہوئے تھے۔ انہوں نے اپنے فلمی کیریئر کا آغاز 1970 سے کیا تھا۔
سادھنا شیو ڈیسانی
60 کی دہائی کی معروف بھارتی اداکارہ سادھنا شیو ڈیسانی سنہ 1941 میں کراچی کے ایک سندھی گھرانے میں پیدا ہوئیں۔ سادھنا کی عمر جب 8 برس تھی تب ان کا خاندان کراچی سے ہجرت کر کے ممبئی آبسا۔
سنجے دت
بالی ووڈ کے سنجو بابا پاکستانی والدین کی اولاد ہیں۔ ان کے والد سنیل دت پنجاب کے ضلع جہلم جبکہ والدہ نرگس دت راولپنڈی سے تعلق رکھتی ہیں۔ نرگس کا اصل نام فاطمہ رشید تھا۔
ریتھک روشن
ریتھک روشن کا ننھیال اور ددھیال دونوں ہی پاکستان سے تعلق رکھتا ہے۔ ان کے دادا جو ایک معروف میوزک ڈائریکٹر بھی تھے گجرانوالہ میں پیدا ہوئے، جبکہ نانا جے اوم پرکاش سیالکوٹ سے تعلق رکھتے تھے۔
گووندا
طویل عرصے سے بالی ووڈ فلموں میں قہقہے بکھیرنے والے کامیڈین اداکار گووندا کے والد ارون کمار آہوجا کا تعلق پنجاب کے شہر گجرانوالہ سے ہے۔ گووندا کے والد خود بھی اداکار تھے۔
خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔
