اسلام آباد: پاکستان تحریک انصاف کے رہنما اسد عمر نے کہا ہے کہ پی ٹی آئی کا 100 روزہ ایجنڈا پاکستان کی جمہوریت کی بنیاد ہے، اپنا ایجنڈا من و عن نافذ کریں گے اور اس پرعمل بھی کریں گے۔
ان خیالات کا اظہار انہوں نے حکومتی وزرا کی پریس کانفرنس پر ردعمل دیتے ہوئے کیا، اسد عمر نے نے کہا کہ حکومتی وزیروں کی فوج نے بیٹھ کر آج پریس کانفرنس کی، وزیروں کو پختونخوا حکومت کی کارکردگی پر اعتراض تھا، اعتراض کا جلد ایسا جواب دیں گے جس سے ان کی تشفی ہوجائے گی۔
تحریک انصاف کے رہنما نے کہا کہ کے پی کے عوام حکومت کی کارکردگی سے مطمئن ہیں، کے پی میں کارکردگی نہ دکھانے والوں کو دوبارہ منتخب نہیں کیا جاتا، پختونخوا میں آئندہ حکومت بھی تحریک انصاف ہی کی ہوگی، تحریک انصاف پہلے سے زیادہ نشستوں کے ساتھ کامیاب ہوگی۔
مزید پڑھیں: احسن اقبال نے عمران خان کے سو روزہ پروگرام کو وژن 2025 کا چربہ قرار دے دیا
اسد عمر نے کہا کہ حکومتی وزیروں کا اعتراض ہمارے 100 روزہ منصوبے پر تھا، ن لیگی وزیروں کا اعتراض انتہائی مضحکہ خیز تھا، کہتے ہیں ہمارا ویژن چھاپا ہے دوسری طرف کہتے ہیں یہ عملی ایجنڈا نہیں، وزیر گفتگو سے پہلے فیصلہ کرلیں کہ ان کا حقیقی اعتراض ہے کیا۔
انہوں نے کہا کہ حکومتی وزیر آئین کا آرٹیکل 38 اُٹھا کر پڑھ لیں سارے شبہات دور ہوجائیں گے، صحت، تعلیم، رہائئش اور روزگار کی فراہمی آئینی طور پر حکومت کے ذمے ہے، بدقسمتی سے حکومتوں نے اس سے پہلے یہ ذمہ داری نبھائی نہیں ہے۔
