قاہرہ : مصری صدر عبدالفتح السیسی نے اپنی چار سالہ دوسری مدت صدارت کا حلف اٹھا لیا ہے، انہوں نے انتخاب میں 97 فیصد ووٹ حاصل کیے تھے۔
تفصیلات کے مطابق عبدالفتح السیسی نے ہفتے کے روز اپنے دفتر میں دوسری مدت صدارت کا حلف اٹھایا، اس موقع پر حکومت کے اراکین بھی تقریب میں موجود تھے۔
مصر کے دارالحکومت قاہرہ میں حلف برداری کے موقع پر فضائی حدود میں لڑاکا طیاروں کے ذریعے مصری پرچم لہرایا گیا اور فوجی ہیلی کاپٹرز بھی دارالحکومت کی فضا میں پرواز کرتے رہے۔
خیال رہے کہ مارچ میں ہونے والے صدارتی انتخاب میں عبدالفتح السیسی نے 97 فیصد ووٹ حاصل کیے تھے ان کے مدمقابل کوئی مضبوط امیدوار نہیں تھا۔
عبدالفتح السیسی کے مقابلے میں ایک غیرمعروف موسیٰ مصطفیٰ موسیٰ میدان میں اترتے تھے، جو خود عبدالفتح السیسی کے پرجوش حامی تھے۔
یاد رہے 2013 نے صدرمحمد مرسی کے خلاف عرصے سے جاری احتجاج کے بعد آرمی چیف جنرل عبدالفتح السیسی نے جولائی میں ان کی حکومت کو ہٹا دیا تھا۔
واضح رہے کہ 27 مارچ 2014 کومصرکے آرمی جنرل عبدالفتح السیسی نے صدارتی انتخابات میں حصہ لینے کے لیے فوج سے مستعفی ہونے کا اعلان کیا تھا۔
خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔
