اسلام آباد : الیکشن کمیشن نے عام انتخابات کےتمام امیدواروں کے کاغذات نامزدگی اور جمع کرائےگئے بیان حلفی پبلک کرنے کا فیصلہ کیا ہے اور کہا کہ تمام تفصیلات ویب سائٹ پر جاری کردی جائیں گی۔
تفصیلات کے مطابق انتخابات کو شفاف بنانے کیلئے الیکشن کمیشن نے بڑا اقدام اٹھاتے ہوئے امیدواروں کے نامزدگی فارمز اور حلف نامے عام کرنے کا فیصلہ کرلیا ہے۔
الیکشن کمیشن کے ذرائع کا کہنا ہے کہ امیدواروں کے حلف ناموں اور نامزدگی فارمز کی اسکیننگ کا آغاز ہوگیا ہے، پہلے مرحلے میں الیکشن کمیشن نے تمام دستاویزات اسکین کرنے کےاحکامات جاری کیے ہیں، لاکھوں کی تعداد میں صفحات اسکین کیےجا رہے ہیں جبکہ اگلے مرحلے میں دستاویزات پبلک کیےجا سکتے ہیں ، تمام تفصیلات ویب سائٹ پر جاری کردی جائیں گی۔
الیکشن کمیشن کا کہنا ہے کہ امیدواروں کے اپنے ہاتھوں سے پر کیے گئے کاغذات نامزدگی اور ان کے بیان حلفی کے بارے میں عوام کو معلوم ہونا چاہیے۔
ذرائع الیکشن کمیشن کا کہنا ہے کہ 2013 کے مقابلے 2018 میں امیدواروں کی تعداد کم ہے ، 2013 کے انتخابات میں 28 ہزار 302 امیدواروں نے کاغذات جمع کرائے تھے جب کہ 2018 میں 21 ہزار 482 امیدواروں نے کاغذات جمع کرائے ہیں۔
یاد رہے کہ سپریم کورٹ نے انتخابات میں حصہ لینے والے امیدواروں کو حلف نامہ جمع کرانا لازمی قرار دیا تھا، جس کے بعد کئی امیدواروں نے انتخابات میں حصہ نہ لینے کا فیصلہ کیا۔
خیال رہے کہ کاغذات نامزدگی کی جانچ پڑتال اور ایپلٹ ٹریبیونل کے فیصلوں کے بعد امیدواروں کی حتمی فہرست 30جون کوجاری کی جائے گی جبکہ آئندہ عام انتخابات 25 جولائی 2018 کو منعقد کیے جائیں گے۔
