اسلام آباد : الیکشن کمیشن آف پاکستان نے انتخابات میں حصہ لینے والے امیدواروں اور سیاسی قائدین کو سیکیورٹی فراہم کرنے کا فیصلہ کیا ہے۔
تفصیلات کے مطابق الیکشن کمیشن آف پاکستان نے صوبائی حکومتوں کو مراسلہ ارسال کیا ہے جس میں امیدواروں کو سیکیورٹی فراہم کرنے کے احکامات دیے گئے ہیں۔
ذرائع کے مطابق الیکشن کمیشن نے امیدواروں کو سیکیورٹی فراہم کرنے کے لیے مراسلہ جاری کیا ہے جس میں احکامات دیے گئے ہیں کہ امیدواروں کے علاوہ ڈسٹرکٹ ریٹرننگ افسران، ریٹرننگ افسران اور اسسٹنٹ ریٹرننگ افسران کو بھی سیکیورٹی دی جائے۔
ذرائع کا کہنا ہے کہ الیکشن کمیشن نے صوبائی حکومتوں کو انتہائی حساس پولنگ اسٹیشنوں پرجلد سی سی ٹی وی کیمرے نصب کرنے کا بھی حکم دیا ہے۔
الیکشن کمیشن نے عام انتخابات کے لیے مانیٹرنگ ٹیمیں تشکیل دے دیں
خیال رہے کہ الیکشن کمیشن کی جانب سے ضابطہ اخلاق کی مانیٹرنگ کے لیے مجموعی طور پر 592 ٹیمیں تشکیل دی گئی ہیں جبکہ صوبائی اسمبلی کی الگ الگ مانیٹرنگ ٹیمیں ہوں گی۔
واضح رہے کہ 25 جولائی کو الیکشن والے دن ہر پولنگ بوتھ پر فوج تعینات ہوگی جو کسی بھی قسم کے ناخوشگوار واقعے سے نمٹنے کے لیے تیار رہے گی اور سیکیورٹی کے سخت انتظامات ہوں گے۔
خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔
