اسلام آباد: پاکستان تحریک انصاف کے ترجمان فواد چوہدری نے کہا ہے کہ نواز شریف کے جھوٹ کی لنکا خود ان کے گھر کے بھیدی نے ڈھائی ہے، نواز شریف کے بیان سے لگتا ہے کہ انہیں دماغی عارضہ ہے۔
ان خیالات کا اظہار انہوں نے نوازشریف کا امیدواروں کو دھمکانے سے متعلق بیان پر ردعمل دیتے ہوئے کیا، فواد چوہدری کا کہنا تھا کہ نواز شریف الزامات لگا رہے ہیں، ایسے بیان کے بعد کوئی شک نہیں کہ نوازشریف کو سنگین دماغی عارضہ ہے۔
انہوں نے کہا کہ تین بار وزیراعظم بننے والے سے ایسی گفتگو کا تصور ممکن نہیں، موصوف جب زبان کھولتے ہیں ریاست اور اداروں پر ہرزہ سرائی کرتے ہیں، نواز شریف کو عوام نے اب مسترد کر دیا ہے۔
جیپ کس کا انتخابی نشان ہے عوام جانتے ہیں، ماضی سے سبق نہیں سیکھا گیا، نوازشریف
ان کا مزید کہنا تھا کہ قابل مذمت روش کے بعد نوازشریف کی سیاست میں بالکل بھی گنجائش نہیں ہے، اہل سیاست نوازشریف کے ریاست بیزار بیانیے سے الگ ہوگئے ہیں۔
خیال رہے کہ مسلم لیگ ن کے قائد نواز شریف نے لندن میں میڈیا سے گفتگو کرتے ہوئے کہا تھا کہ یہ جیپ کس کا انتخابی نشان ہے عوام سب جانتے ہیں، ن لیگی امیدواروں پر پی ٹی آئی میں شمولیت کے لیے دباؤ ڈالا جا رہا ہے۔
انہوں نے یہ بھی کہا تھا کہ ن لیگی امیدواروں سے وفاداریاں تبدیل کرانے کی صورت حال افسوسناک ہے، امیدواروں کو پی ٹی آئی میں شامل ہونے کے لیے دباؤ ڈالا جارہا ہے، یہ تمام صورت حال پری پول دھاندلی کے زمرے میں آتی ہے، لگتا ہے ماضی سے سبق نہیں سیکھا گیا۔
خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔
