لاہور : لیژر لیگس فٹبال قومی چیمپئن شپ میں کامیابی کے بعد لاہور کی آئی سی اے ڈبلیو کو آئی ایس ایف ورلڈ کپ پُرتگال کا ٹکٹ مل گیا، فائنل میں آئی سی اے ڈبلیو نے پشاور کی شنواری ایف سی کو شکست دے دی۔
تفصیلات کے مطابق لاہور کی آئی سی اے ڈبلیو ایف سی (آئی کین اینڈ ول) نے آئی ایس ایف ورلڈ کپ پُرتگال کا ٹکٹ حاصل کرلیا، جب انہوں نے پشاور کی شنواری ایف سی کو فائنل میں سڈن ڈیتھ پنالٹی کک پر 3-2کی شکست سے دوچار کرکے لیثررلیگس نیشنل چیمپئن شپ کی فاتح ٹرافی پنے نام کی۔
فاتح ٹیم پرتگال کے شہر لسبن میں 5اکتوبر سے شروع ہونے والے سکس اے سائیڈآئی ا یس یف ورلڈ کپ میں پاکستان کی نمائندگی کرے گی, بلوچ مجاہد فٹبال اسٹیڈیم پر فلڈ لٹ میں کھیلا جانے والا فائنل انتہائی دلچسپ اور سنسنی خیز ثابت ہوا۔
لاہور کی آئی سی اے ڈبلیو اورپشاور کی شنواری ایف سی نے شاندار کھیل کا مظاہرہ کیا، دونوں ٹیموں کے گول کیپرز نے کمال مہارت کا مظاہرہ کرتے ہوئے ایک دوسرے کے تابڑ توڑ حملوں کو ناکام بنائے رکھا، مقررہ وقت میں دونوں ٹیمیں کوئی گول اسکور نہ کرسکیں۔
ٹائی بریکر پر بھی میچ کا فیصلہ نہ ہوسکا، سڈن ڈیتھ پنالٹی کک پر لاہور کی آئی سی اے ڈبلیو ایف سی نے 3-2کی فیصلہ کن کامیابی کے ساتھ میدان مار لیا۔
سابق وزیر اعظم پاکستان میاں محمد سومرو، نگراں صوبائی وزیر کھیل ڈاکٹر سید جنید علی شاہ، سابق ڈی جی رینجرز کراچی لیفٹیننٹ جنرل جاوید ضیاءنے بحیثیت مہمان خصوصی ٹیموں میں ٹرافی اور کھلاڑیوں میں دیگر انعامات تقسیم کیے۔
سندھ کے اسپورٹس منسٹر ڈاکٹرسید جنیدعلی شاہ نے لیثرر لیگس کی ملک میں فٹبال کی ترقی کی کوششوں کوسراہتے ہوئے کہا کہ اس سے نوجوان کھلاڑی صحت مند سرگرمیوں کی جانب راغب ہونگے جو ایک مثبت سائن ہے۔
لیژر لیگس نیشنل چیمپئن شپ میں پاکستان کے 8شہروں کراچی، حیدرآباد، قلعہ سیف اﷲ، کوئٹہ، مردان، پشاور ، اسلام آباد اور لاہور کی ٹیموں نے شرکت کی۔ جنہیں 4,4کے 2گروپ میں تقسیم کیا گیاتھا۔
خبر کے بارے میں اپنی رائے کا اظہار کمنٹس میں کریں‘مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔
