چترال: ثقافتی اور روایتی رنگوں سے سجے صدیوں قدیم تین روزہ جشن شندور کا آغاز ہوگیا.
تفصیلات کے مطابق آج دنیا کے بلند ترین پولو گراؤنڈ شندور میں تین روزہ میلہ کا آغاز ہوا، جس میں گلگت اور چترال کی روایتی حریف پولو ٹیموں کے درمیان مقابلے جاری ہیں.
میلے کے پہلے دن تین میچ ہوئے. پہلا میچ گلگت کی پھنڈر اور چترال کی لاسپور پولو ٹیم کے درمیان ہوا، جو لاسپور پولو ٹیم نے ایک کے مقابلے میں پانچ گولز سے اپنے نام کیا.
افتتاحی میچ میں خیبر پحتون خواہ کے نگران وزیر اعلیٰ جسٹس ریٹائرڈ دوست محمد خان مہمان خصوصی تھے. 
اس موقع پر FCPS اسکول کے طلبا و طالبات نے قومی نغمے پیش کیے، جن کے لیے وزیر اعلیٰ کی جانب سے ایک لاکھ نقد انعام کا اعلان کیا۔
مہمان خصوصی نے اول آنے والی ٹیم کے لئے دس لاکھ، دوسری پوزیشن کے لئے سات لاکھ اور تیسرے پوزیشن کے لیے پانچ لاکھ کا اعلان کیا۔
اس موقع پر وزیر اعلیٰ نے خطاب کرتے ہوئے کہا کہ چترال بہت خوبصورت، پرامن علاقہ ہے، ضرورت ہے کہ اس کی سڑکوں کی مرمت کے لئے سنجیدگی سے کام کیا جائے گا۔
دوسرا میچ میں سب ڈویژن مستوج (چترال) اور سب ڈویژن یاسین (گلگت) کی ٹیمیں مدمقابل آئیں۔ یہ میچ مستوج کی ٹیم نے پانچ کے مقابلے میں آٹھ گولز سے اپنے نام کیا. اس موقع پر گلگت بلتستان کے وزیر سیاحت مہمان حصوصی تھے۔
تیسرا میچ چترال ڈی اور گلگت ڈی ٹیموں کے درمیان کھیلا گیا، چترال پولو ٹیم نے دو کے مقابلے میں چھ گولوں سے گلگت پولو ٹیم کو شکست دی۔ اس موقع پر کمانڈنٹ چترال اسکاؤٹس کرنل معین الدین مہمان حصوصی تھے.
جرمنی کے سفیر مارٹن کوبلر اور امریکی خاتون فرسٹ سیکرٹری ڈیویلپمنٹ کارپوریشن ماریون فینگس نے بھی اس رنگا رنگ تقریب میں شرکت کی، غیرملکی سیاحوں کی بھی بڑی تعداد موجود تھی.
ماریون فینگس نے نمایندہ اے آر وائی نیوز سے بات کرتے ہوئے کہا کہ یہ ان کا چترا ل اور شندور کا پہلا دورہ ہے، یہاں آکر بہت خوش ہیں، چترال خوبصورت اور پرامن علاقہ ہے، غیرملکی سیاحوں کو یہاں ضرور آنا چاہیے.
شندور میلہ کے دوسرے دن بھی تین میچ ہوں گے، جو چترال سی گلگت سی، چترال بی، گلگت بی، چترال آفیسرز اور گلگت آفیسرز کے درمیاں کھیلے جائیں گے.
جشن کے پہلے روز صوبائی وزیر سیاحت محمد رشید درماخیل، وزیر خزانہ حاجی فضل الہیٰ، گلگت بلتستان کے وزیر کھیل و سیاحت، کمشنر ملاکنڈ ڈویژن سید ظہیر الاسلام ، سیکرٹری ٹورزم کارپوریشن خیبر پحتون خواہ طارق خان، منیجنگ ڈائریکٹر مشتاق احمد ، کمانڈنٹ چترال سکاؤٹس کرنل معین الدین اور ڈپٹی کمشنر چترال بھی موجود تھے۔
چترال اسکاؤٹس کی بینڈ پارٹی نے بھی پرفارم کیا، پولو میچ کے ساتھ ساتھ پیرا گلائڈنگ او ر ہینڈ پیرا گلایڈنگ کا بھی مظاہر ہ کیا گیا.
چترال کے سالانہ پولو ٹورنامنٹ کا آغاز، رنگا رنگ افتتاحی تقریب
